严崇天苦练韩文突围　成御用韩星见面会主持人

近年几乎每个月都有韩星到港，粉丝忙住追星之余，可能都会留意到，唔少韩星Fans Meeting或记者会，都会见到同一班工作人员，奇妙电视主播严崇天就系其中一位。大学时期已经修读韩文嘅阿天，单系今年已经做咗6次韩星活动主持，深受主办单位及韩星粉丝赞赏，俨如韩星御用主持一样﹗阿天表示：“好多韩星私下都好nice架﹗”

依家识多一种语言真系工作机会都多过人，好似阿天就真系“赢在起跑线”，早喺大学时期韩风未咁盛行时已经修读韩文：“当时因为学日文嘅人太多水平又好高，所以自己拣韩文，比较易突围而出。离开校园后断断续续有继续进修，前年及去年更连续两年向公司请假，飞到韩国嘅大学上堂，亦因此增加唔少同韩星有关嘅工作。”

单系计今年阿天已经主持过6次韩星活动，为泫雅Fans Meeting担任司仪令佢最为难忘：“出场前泫雅问我叫咩名，本身话叫我司仪就可以，泫雅就好坚持话唔得要我讲韩文名俾佢知，出场时泫雅居然专登讲一段介绍我，令我受宠若惊。去到教粉丝跳舞嘅环节，唔知点解台下歌迷起哄要我跳，造就呢个同泫雅共舞嘅难忘回忆。”

由于佢本身识讲流利韩文可以直接同韩星沟通，相对要透过翻译对答，明显感受到气氛更为流畅，唔少粉丝SHOW后更会专登到社交网站留言赞呢个MC做得好﹗“我记得主持陆星材见面会时，有粉丝太紧张唔记得拎手机，点知完场大家散晒差啲俾唔返D相佢地。其实除咗主办单位同韩星，粉丝都系好重要嘅一部分，得到佢地赞赏我都相当开心。”阿天依家更成为韩国观光公社嘅韩游团长，帮佢地宣传韩国文化，年尾会再到韩国进修韩文同埋学整韩国菜，全方位进修韩国文化。