【Cult片】麦浚龙煲住血腥片《铁甲威龙》长大：细路仔唔应该睇

讲起Cult片，真系不得不提麦浚龙（Juno），因为佢的确系香港地里面数一数二嘅专家。喺加拿大煲Cult片长大嘅佢就曾经喺佢阿哥麦浚翘主理嘅杂志《Milk》里面写过三年专讲Cult片、B片嘅专栏《Wasteland Treasures》，介绍过好多香港人唔熟或者睇漏咗嘅电影，令读者大开眼界。结束咗专栏后，Juno就开始专心写剧本、拍戏，先后执导《僵尸》（2013）同警匪片《风林火山》（预计2018年年末或2019年上映），系好间唔中先写下稿讲其他片。

几年前入戏院睇《僵尸》嘅时候，真系觉得好惊，一来系剧情、画面都好恐怖，特别系吴耀汉嘅僵尸造型同陈友扭罗庚扭到手断一幕，到依家都仲记得好清楚；二来系首次执导嘅Juno即使系以拍到烂嘅僵尸片做题材，都能够呈现到自己嘅Cult爆美学，执行上都比好多新导演成熟得多，所以真系好有冲击。

咁到底影响得Juno最深嘅Cult片系边套？佢嘅电影美学又系点样形成呢？早前好好彩可以喺一个品牌活动上捉到Juno问两句，当我同佢讲到上述部分时，佢嘅答案令我有啲惊讶：“系《RoboCop》（铁甲威龙），呢套电影系我细个翻睇得最多嘅戏。”当时我第一时间就谂，明明《铁甲威龙》好大路吖，点解会系一套Cult片，我想问点解时，佢就继续讲：“其实佢唔只系一套Cult片，佢野心好大，架空一个世代出嚟，里面有自己嘅广告，有自己嘅新闻，有一个独特嘅世界观。佢好暴力，暴力到以我当时仲系细路仔嘅年纪嚟讲，系一套唔应该睇嘅戏。”

因为时间嘅问题，我问唔清楚点解Juno觉得《铁甲威龙》（1987）系一套Cult片，但系我深信佢讲得出，一定有佢嘅道理，所以之后我翻睇多次呢套戏。《铁甲威龙》呢套戏主要系讲一个叫Murphy（Peter Weller饰）嘅警察与劫匪枪战后伤重不治，一个高科技公司就拎咗佢残缺不堪嘅尸首改造成RoboCop，一个为打击罪恶嘅存在嘅Cyborg。虽然经历洗脑程序，但Murphy仍有些少残余记忆，更凭此线索找出劫匪。劫匪首领遭逮捕时就指幕后主脑是高科技公司总经理Dick，但Murphy因程式设定无法对抗公司主管，所以束手无策。最后，公司大老板在得悉Dick真面目后下令开除Dick，令Murphy可以亲手杀死这个大奸角。

学者Ernest Mathijs同Xavier Mendik喺《The Cult Film Reader》（2008）一书中，为Cult片下定义，指Cult片有8个特征，包括：烂、创新、挑战Genre、离经叛道、开放式结局、血腥、怀旧以及呼应其他文本。当然，两位学者唔系话有齐8个特征先称得上Cult片，佢哋系讲紧一套Cult片多数有一个或以上嘅上述特征。如果睇以上特征，《铁甲威龙》的确系至少中咗一样，血腥。戏中的确有唔少血腥场面，包括高科技公司员工被失控的执法机械人乱枪射死、Murphy被劫匪射断手手脚脚。不过，得一个特征中咗就认定《铁甲威龙》系Cult片又似乎好似争啲咁，有少少草率，即系史提芬史匹堡嘅《大白鲨》都好血腥，但话佢系Cult片又唔系几称得上。

咁会唔会有一个比较决定性嘅理据，可以话《铁甲威龙》系Cult片？其实Cult片呢样嘢，从来都唔系一个电影种类，用标签嚟讲应该更加贴切。而呢种标签唔系一个人就做到嘅事，而系好多人参与嘅事。一套Cult片，除咗电影内容本身令到佢成为Cult片，仲要靠一班Fans、信徒去成就。《铁甲威龙》有一大班追随者，而呢班追随者就构成咗一种文化，唔同层面、情况下会睇到呢种文化嘅影子，就好似外国嘅Cosplay活动中，唔难揾到Cosplayer扮演RoboCop咁。而《铁甲威龙》更加系影响到一代人，翻拍2014版《铁甲威龙》嘅导演José Padilha就曾经系访问度讲过，自己唔想拍其他戏，净系想翻拍《铁甲威龙》，更当面要求拥有版权嘅Sony畀佢翻拍，可见佢深受呢套戏嘅影响。新版本嘅《铁甲威龙》就正正系呼应紧1987版《铁甲威龙》，比起呼应一套戏，被一套戏呼应更见其文化影响力，所以《铁甲威龙》的的确确系套Cult片。