【哈里王子大婚】英女皇青柠色外套超抢镜　背后意思你又知唔知？

哈里王子(Prince Harry)同梅根马克尔(Meghan Markle)上周六(5月19日)完婚，日前(5月21日)肯辛顿宫(Kensington Palace)发布了哈里王子同梅根嘅官方婚照。照片于肯辛顿宫内的绿色会客室(Green Drawing Room)内进行进行拍摄，更由流著波兰皇室血统嘅摄影师Alexi Lubomirski操刀。相中见到所有人都大方端庄，衣服颜色都非常和谐，但无论梅根婚纱有几靓，都唔及“事头婆”英女皇青柠色套装咁抢镜！

咁究竟点解英女皇会著青柠色呢？英女皇一直都以单色系设计示人，今次嘅青柠色外套同紫色印花连身裙均出自皇室御用英国设计师Stewart Parvin手笔，再衬埋同色嘅Angela Kelly帽。其实喺纪录片《The Queen at 90》入面，威塞克斯伯爵夫人(Countess of Wessex)解释过，英女皇作为重要人物，当然每次现身都要令大家留意到佢踪影，所挑选嘅衫必定要更加抢镜。

至于点解挑选绿色系，全因绿色代表住成长同重生，喺重要嘅公开场合著绿色就代表尊重及对未来嘅希望。另外，今次嘅皇室婚礼都打破好多传统，呢样喺英女皇身上嘅紫色都睇得出。紫色代表咗清洗同对创意嘅热情，充分代表咗英女皇嘅前卫思想，由颜色就睇到英女皇对新人嘅祝福，更加别具意义。