【深宫计】又系植入式广告？ 胡定欣眉心花钿同华为Logo撞到正
撰文： 关颖贤
出版：更新：
《宫心计2深宫计》昨日(5月21日)播出首集，除了睇剧中复杂的人物关系及权力斗争，值得留意就是女演员华丽的唐代妆容。其实唔只系《深宫计》，有好多以唐朝作背景的剧集，包括向海岚担正的《杨贵妃》、范冰冰的《武则天》等，剧中见到身为皇族的女角色额头均贴上花钿，而唐朝正是使用花钿的鼎盛朝代。最搞笑嘅系有眼利嘅网民睇trailer时，发现胡定欣额头上的花钿竟然好似华为logo，相信应该可能或者唔系植入式广告嚟(好似系)。
讲返“花钿”，其实系指贴喺两鬓、眉间、眼尾或者面颊上嘅花型装饰物，令女士美貌更添动人，系唐朝妆容上嘅特别之处，不过只有妃嫔先可以画。花钿嘅颜色主要为红、绿色同黄色，而形状方面就好多元化，好似梅花形、桃花形、牛角形、扇形、圆点形等。妃嫔地位越高贵，图案就会越花巧，同时越大朵嘅花就代表位置越高，有时都会贴上金箔同宝石去突显其地位，通常都会以黑光纸、鱼腮骨、云母片等材料制作，再以阿胶贴上额头，卸妆嘅时候用热水敷一阵即可。好似刘心悠咁，一开始做宫女嘅时候眉心都冇画任何花钿，去到变成玲珑公主之后先画上花钿。
咁到底几时开始有“花钿”嘅出现呢？其实都有几个讲法，其中一个就系喺公元677年，上官婉儿因为才学过人被武则天提拔，由奴婢“升呢”做机要秘书。之后被武则天发现男宠臣钟意上官婉儿，所以嬲到挥剑画花上官婉儿眉心，仲留疤。身为好朋友嘅太平公主喺上官婉儿眉心画咗朵梅花，令上官婉儿添上几分妩媚，令到唐朝盛行呢个“梅花妆”。亦有另一个讲法，就系喺南朝《宋书》入面有提及过宋武帝刘裕囡囡寿阳公主正月初七喺含章殿瞓觉，有朵梅花跌咗落公主嘅额头，仲染成花瓣形状，获宫中妃嫔争相模仿。