胡琳远赴冰岛为MV取景　挑战高难度拍摄

出名靓声嘅胡琳(Bianca)刚推出新专辑入面第二首主打歌《青玉案》嘅MV，新歌引用宋代诗人辛弃疾嘅千古绝诗为创作元素，将细腻诗句融入歌词中，营造凄美意境，在歌声里添上诗情画意。今次嘅MV喺冰岛取景，无论拍摄手法定系构图，都媲美名师笔下嘅山水画。Bianca喺MV尾段只穿上单薄蓝色裙游走冰川，挑战高难度摄制手法：“𠮶段片拍摄时要请专业登山导游协助，做足安全措施，所以我嘅上身系裙，下身就著咗对完全唔衬嘅钉鞋！当时全体工作人员徒步行咗个几钟先到取景位置，大家都拎住好多器材，过程超辛苦，拍出嚟之后睇到嘅画面真系好震撼，同埋非常值得。”

其中一段Bianca以红裙登场嘅凄美画面取景于黑沙滩，其实系电影《神奇女侠》女主角Gal Gadot拍摄手机广告嘅地点相同，拍摄出嚟嘅效果，都令大家好自豪。为咗营造意境，Bianca嘅团队带咗一份用毛笔写上嘅歌词迎风摄录，但因为风速过大，纸张突然飞脱，Bianca笑言：“大家不顾仪态咁追，导演仲追到四脚朝天，我忍唔住一边冲上前协助，一边丧笑！”

Bianca近年在音乐制作上参与度越来越高，除投入演绎外，亦致力作曲填词，谓：“新碟入面有五首歌都由我作曲、两首填词，其实填词好考个人学识同功力，为咗令作品丰富啲，我都有逼自己去背唐诗三百首，希望之后可以将名诗融入自己作品入面。”