名嘴Jimmy Kimmel街访美国人　图书管理员都讲唔出一个书名？

回想一下，你有几耐冇喺香港见到人睇书或者睇报纸，搭地铁同巴士个个都做“低头族”。早前民政事务局公布2017年图书馆借书排行榜，其中小说类嘅书籍，头10位有8本都系旅游书。睇完呢个数据，可能觉得呢样野只系发生喺香港，以为外国文化水平会高啲啦，点知都系差唔多。

主持过两届奥斯卡同艾美奖嘅美国名嘴Jimmy Kimmel所主持嘅清谈节目《Jimmy Kimmel Live》，以幽默嘅角度探讨唔同社会议题，令观众反思不同现象而红爆全球。日前Jimmy Kimmel于节目内提到，根据美国民调机构皮尤研究中心﹝Pew Research Center﹞调查显示每四个美国人入面就有一个喺过去一年内冇睇过一本书，所以Jimmy Kimmel派咗一team人出去进行街访《Can You Name a Book?》，结果令人哭笑不得。

片段入面访问咗12位途人，被问到可否讲出一个书名嘅时候，个个都口窒窒，谂咗好耐都讲唔出一个书名。其中一个最好笑嘅，竟然有一位图书管理员日日连一本书名都讲唔出，佢自己都尴尬自嘲：“而家我要失业喇。”另外，有趣嘅系，问到究竟对上一次睇书系几时，有4位就话系美国著名童话故事书作家Dr. Seuss嘅作品，亦有人话已经12年冇睇过书。