【吸烟有害】欧铠淳曲线“公开”拣胡子彤原因：佢唔食烟！
撰文： 赖家杰
出版：更新：
作为一名运动员当然唔应该有吸烟习惯，“世界无烟日2018”活动邀请欧铠淳(Stephanie)担任嘉宾亦非常正路，Stephanie成日要参加游水比赛，所以一定唔可以成为烟民：“自己本身唔食烟，尤其对运动员嚟讲会更差，因为游水系一种心肺功能要求好强嘅运动，游水好需要肺活量，所以唔会谂（食烟）呢样野。”男朋友胡子彤有冇呢个食烟呢？“佢唔食烟㗎，呢一个都系我拣男朋友嘅一个条件嚟。”
活动期间，听到Stephanie把声有少少沙哑，原来系同佢生日有关：“因为我地有个‘五月之星’生日会，所以寻晚一班朋友去咗唱K，都系游水嘅朋友仔，一年一次好难得。”当中包括薛凯琪，点解呢？原来系男友专登安排：“佢叫咗Fiona嚟唱歌，自己都见过佢好多次，今次第一次同佢有互动，所以琴日好似发紧梦咁。”不过距离Stephanie嘅生日都仲有10日，5月30日先正日生日，佢都好期待男朋友会准备不一样嘅惊喜畀佢。
又大一岁，虽然Stephanie觉得系一件开心事，但同样更加唔想面对又大一岁嘅来临，所以都选择唔想刻意去谂呢个数字，随著年纪越大咁会唔会开始屋企人有催婚？Stephanie坦言：“咁又冇，由细到大都冇，我爸爸妈妈比较开明，做全职运动员佢哋都知道，所以完全冇咁样嘅状态。”