【专访】竟然唔系《山狗》？　余允抗最满意作品“好唔余允抗”

新浪潮导演余允抗喺电影生涯里面执导过7套电影，包括《师爸》、《山狗》、《凶榜》、《马后炮》、《飞虎奇兵》、《歌舞升平》同《凶猫》，套套都有唔同特色，唔系独沽一味恐怖变态片。我自己就钟意《马后炮》，因为有唔少笑位，王青、郑则仕都做得好有喜感，但余允抗就对自己呢套作品唔多满意：“制作系好好，但如果套戏系刘镇伟拍就掂好多，因为我拍得唔够癫、唔够无厘头。我拍到个形式，但拍唔到个韵味，睇几多次都系咁觉得，我以为新艺城拍到，我都拍到，点知唔得。”

【专访】《山狗》导演余允抗拍7套片就收山　原因其实好简单？

【专访】余允抗唔做导演照关心电影业发展：依家的确系青黄不接

《歌舞升砰》罗素杨雪仪有化学作用咁余允抗最满意自己边套作品？答案令我好意外，佢咁答：“我好钟意自己套《歌舞升平》。”咩话？我觉得唔好睇㖞，一来好唔“余允抗”，二来情节好唔合理，因乜解究杨雪仪明明好爱罗素，但系唔阻止罗素喺三楼跳落地，净系自己喺厨房隔住个窗睇件事发生。余允抗自己就咁讲：“我觉得佢哋系有个感情喺度，当时拍之前我叫罗素同杨雪仪沟通下先，畀咗间房仔佢哋入去睇《Love Story》，之后佢哋开工就好有化学作用喇。（我觉得梅艳芳戏份太少。）佢都好好骨干，佢同黄沾嘅感情线好睇，一个艺人同一个经理人，关系好微妙，若即若离咁。”虽然佢咁讲，但系我觉得呢套戏最正都系首歌 ── 《迈向新一天》。