【专访】余允抗唔做导演照关心电影业发展：依家的确系青黄不接　

另一篇文讲咗《山狗》导演余允抗点解会咁突然离开影圈，不如呢篇文就讲下其实佢点样睇依家嘅电影。不过，喺探讨呢个问题之前，我哋好应该问余允抗到底今时今日仲会唔会睇戏。正所谓“最锋利嘅刀又点会生锈”，余允抗就话佢睇戏都睇得几密下：“旧戏新戏都睇，平日6点几收工后，返屋企食完饭到7、8点，我多数睇套戏先瞓，我11点左右就瞓。差唔多每个礼拜都有2、3套戏，我呢个年纪夜晚就系做呢啲咋嘛。”

【专访】《山狗》导演余允抗拍7套片就收山　原因其实好简单？

【专访】余允抗最满意作品竟然唔系《山狗》　最后答案包你估唔到

咁近期最欣赏边套？余允抗就话最欣赏就系老友许鞍华嘅《明月几时有》：“林超贤嘅《红海行动》、《湄公河行动》都好得，小品嘅就张艾嘉嘅《相爱相亲》。其实呢几套戏可以睇到依家中国电影嘅形势。一系就大制作，揾最红最劲嘅导演、演员，输极有限。一系就老细好钟意个剧本，觉得唔会蚀死自己，就试下拍。”

讲返之前金像奖许鞍华第六次拎最佳导演，会唔会觉得新一代好似追唔上新浪潮嘅导演？余允抗真心觉得影圈有青黄不接嘅情况：“唔系话新人冇能力，系觉得佢哋参与度唔够。可能有好多原因，一系就睇唔起班老嘢，一系就太有个性，一系就唔认同呢个行业或者组织。我唔相信上一代人唔侵新一代玩，你要有参与先会改变到现状。”其实呢番说话真系几有参考性，唔单止讲影圈，仲系讲紧香港社会。