谢霆锋传授独门煮面法　劲多骑呢位兼爆粗：fxxking delicious！

“你肚饿呀？煮个面你食呀。”香港人出名极爱食即食面，总有几包看门口，仲要日日都有独门煮面秘方添﹗汤料放碗定落埋水、面使唔使过冷河？讲真无绝对答案，最紧要自己啱食。谢霆锋近年每次以Chef Lemon身份示人，都为大家带来好多惊喜，呢日佢拍片推介自家新研发嘅拌面，霆锋话：“正如煎牛扒大家都系一块牛一个煎pan点解可以咁唔同？今日就示范我自己嘅标准﹗”网友睇完都觉得，真系好多个位值得深入讨论。

Chef Lemon独门煮面法，首先要好猛火煲到水滚落面，不过佢话：“我接受唔到而家呢种淀粉爆发情况”然后，倒咗三分一杯冻水入去，又要默默等水滚啦，呢个时候正好走去切下鲍鱼切下葱。另外原来煮面都仲要试面架噃，Chef Lemon夹起一条面，用手指一揿，条面条断得好干净，就系佢钟意食嘅质感啦。睇到呢度网友已经十万个问号，留言话：“点解咁似整负离子直发拎一条头发出黎咁check？”、“滚完又落冻水，过冷河都唔系咁过啦下吗﹗”

一向好有个人风格嘅Chef Lemon，话明分享个人标准呀吗：“捞面如果姿姿整整搅太耐嘅嘅话，会凉得好快（唔好食）。”不过网友就发现，Lemon捞好面放完鲍鱼，由拎起樽樱花虾酱、到夹出大大只虾到放上面讲句完成，足足用咗20秒。睇完2分半钟嘅教学分享，网友大多感到无言：“未睇之前以为佢系教人点调酱整捞面！睇咗原来系即食捞面……”话晒系国际知名大厨，霆锋食完一啖仲爆粗话：“is fxxking delicious﹗”不如俾次机会，跟住Chef Lemon煮完一次再评价啦。