【逆缘】极速衰老明抄米路吉逊扮冷冻人？　TVB又“撞”旧片桥段

《逆缘》踏入结局阶段，剧情愈来愈紧张刺激之余，亦有好多谜团尚待解决。虽然刚刚就揭晓咗杀死陈山聪嘅凶手真正身份，但最近故事又揭示咗陈家乐嘅衰老速度比正常人快几十倍，即将迎接生命终结，令大家更想知陈家乐最后会点。一直以来，好多观众话冷冻人解冻后嘅生活呢个Concept系“参考”超级英雄片《美国队长》系列，但其实陈家乐条线嘅布局比起《美国队长》系列，更似由米路吉逊（Mel Gibson）主演嘅《Forever Young》，而且内容仲有八成相同，或者呢套旧荷里活戏可以揭示到《逆缘》之后嘅故事发展。

米路吉逊喺1992年上映嘅《Forever Young》里面，因为女友伊沙贝格拉瑟（Isabel Glasser）撞车昏迷变植物人，万念俱灰嘅佢就决定接受冷冻实验，暂时自己生命。不过，米路吉逊并冇照原定计划咁一年后苏醒，反而系到咗1992年先由两个无意中闯入实验室嘅小朋友唤醒。其后，快速衰老嘅米路吉逊同新相识嘅女性朋友（即系其中一个小朋友嘅妈咪）四出找寻当年嘅实验团队以及研究计划，但系完全徒劳无功。不过，米路吉逊意外地发现女友冇死到，亦揾到对方嘅下落。最后，已成老人嘅米路吉逊同伊沙贝格拉瑟再次相遇，而女方应承男方嘅求婚。

虽然《逆缘》花咗好大篇幅去讲讲黎耀祥点样做神棍敛财，但系对于观众嚟讲最新鲜最养眼都系靓仔陈家乐𠮶条线，当中仲有人觉得呢条线先至系主线。呢条线一开始就系陈家乐机缘巧合下喺防空洞嘅冷冻室里面苏醒，之后佢就四出找寻失散多年、由汤洛雯饰演嘅老婆，经过一啲错摸后佢就开始抛低往日嘅事，去接受中日混血儿林夏薇并与之发展。当大家以为佢哋会开花结果时，就无啦啦爆出陈家乐正在急速老化，加上最近嘅剧透就预告咗汤洛雯会再度亮相，即使大家仲未确定到汤洛雯系真系另一个角色，还是明明系老婆却扮新身份，但结构上、转折点上都可以话《Forever Young》极度相似，只系细节位有所不同咁。

或者我哋可以用《Forever Young》嘅情节去估计《逆缘》嘅最后发展。当陈家乐与汤洛雯“重逢”后，陈家乐有唔细嘅机会揾方法同汤洛雯“再续前缘”，甚至求多次婚，兜口兜面同林夏薇讲Bye Bye。不过，如果最后真系咁，又真系几令人失望，毕竟我哋睇住陈家乐同林夏薇由误会到相识相知，之后发展成情侣，有个感情喺度，同埋咁搞法真系十成十抄《Forever Young》，难睇。为咗探求真相，早一步知道个结局，清楚监制王心慰（Amy）一向口密嘅我，就向一班公关妹妹埋手，睇下会唔会收到咩风，点知其中一位就话：“Amy姐唔肯爆呀，话条桥一讲就穿，总之观众睇完会有个想像空间。（咁陈家乐最后系同边个一齐？）应该就系林夏薇嘅。”又有想像空间，又应该同林夏薇，真系好难触摸。