【普通话有限公司】MC Jin将任《中国新说唱》导师：系个挑战！
撰文： 赖家杰
出版：更新：
欧阳靖今午为奇妙电视节目《天下第一Friend 2》录影，到底有冇准备节目上大爆秘密？MC Jin：“大爆呢样嘢我觉得自然就最好，其实好话唔好听，其实系要睇个节目同埋个主持人。”
今日节目录影完之后，MC Jin就要返美国陪伴家人，因为佢平时工作都要飞嚟飞去，所以MC Jin就话依家其实都系用Facetime去维系同儿子之间嘅感情：“真系好佩服上一代或者上上一代嘅人，因为以前嘅人系靠书信形式嚟联系，有时仲要等几日先收到，所以真系觉得佢哋好厉害。”
节目录影时，主持人郑绍康安排咗生日蛋糕送畀MC Jin，因为6月4号就系佢嘅生日，而佢个仔就早佢3日，亦即系6月1日生日，唔怪得要赶返去美国啦！MC Jin话，今年生日正日都会同个仔一齐庆祝，转眼间，佢个仔已经就快6岁，MC Jin直言自己都唔后生喇：“你唔好话佢咁快大个啦，我唔经唔觉都已经30+6啦，好快又就到40岁，我都系咁同人讲我就快40岁，完全唔介意人哋讲我年纪。”
除了年纪转变，身份上都有另一个转变，就系成为《中国新说唱》导师，但大家都知道，MC Jin嘅普通话水平就真系普通过普通，MC Jin都承认自己系“有限公司”：“讲普通话真系一个挑战，但其实能够成为导师系开心事，可以将Rap传承落去，我都会自己有限普通话讲落去。”