【咸猪踭批胸】《东张》利颖怡IG自爆曾中招：遇到呢啲情况要出声

无线节目《东张西望》外景主持利颖怡（Joan）一向有正义感，早前佢采访五月天演唱会开售时，就因为见到售票处职员就对排队党打尖视若无睹，而忍唔住为在场守规矩嘅五迷发声。最近，网上疯传一段中年男人五秒内以批踭胸袭两名少女嘅片，而Joan睇完之后都觉得好愤慨，仲喺社交网站分享自己被非礼嘅亲身经历，希望所有女士可以引以为鉴，必要时要大声嗌唔好。

【东张西望】为五迷出头　利颖怡被职员话多事：点解打尖嘅拎筹先

Joan喺自己嘅Instagram里面就讲返自己读中学时，搭电车被男人批踭撞心口嘅经历：“那时少女（Joan自己）不敢出声，怀疑是不是叔叔不小心撞到呢，因为他每次撞到都在看著天花板，是不是错觉？结果下车时少女跟姐姐说了，姐姐立刻走上踢他一脚再回来，叔叔沉默地回头瞪两姊妹。那时姐姐便说：‘世上不会有那么多不小心。电车上人不多他为什么偏要挤到你身旁？撞你一下是不小心、撞你第二次就是故意。他不是心虚怎么可能我踢他他都没有骂我？！以后自己小心！我不是每次都在你身旁！’”之后Joan就意识到自己要学识保护自己。

讲返条批踭片本身，Joan接受《香港01》访问时直言，觉得片中两位女士好似唔知自己被抽水咁：“睇佢哋啲反应好似唔多介怀咁，而我自己就系因为电车件事，先发现有啲男人谂唔好嘅嘢，之后就识得避开，我觉得女士们都应该主动同其他人保持距离，唔可以俾人任意批踭。”

“斋拍片其实冇用！”

讲到条片净系交代咗件事嘅发生，唔知到后续嘅情况，例如拍摄者最后有冇企出嚟指责𠮶位色狼，Joan就话：“其实除咗拍片之外，我觉得睇到件事发生嘅人系应该上前同𠮶位先生理论，因为斋拍片其实系冇用，阻止唔到佢继续做落去。”咁应该点开口呢？佢就建议：“先生，我头先见到你批踭撞几个女仔心口㖞！”咁如果𠮶位男士死口唔认呢？Joan就话要咁应对：“同佢讲有片有真相，拎条片出嚟咁佢对质。”

其实自为五迷发声一事后，好多人都封Joan做正义女神，但佢就觉得呢个称号对佢嚟讲实在太过誉太夸张：“我只系觉得做女仔遇到呢啲情况真系要出声，好多嘢真系唔系唔小心，有少少问题就要避开、望清楚，唔咁做，最蚀底就系自己。同埋我觉得我唔算好正义，纯粹系觉得有啲嘢系唔啱要出声，出声都系为咗保护自己，唔关正唔正义事。”