【烂鬼Cult噏】余允抗收山作《凶猫》唔合格？　恐怖位照样吓破胆

Cult片王余允抗执导嘅《山狗》、《凶榜》都真系好杰作，但佢嘅电影生涯其实唔止拍过呢两套戏，喺1980年至1987年间佢就先后执导过7套电影，而恐怖片《凶猫》就系佢嘅收山之作。不过，好多人都话《凶猫》及唔上《山狗》、《凶榜》，咁事实上系唔系咁呢，又系唔系冇值得一赞嘅地方？不妨睇完下面嘅文字再下定论。

【烂鬼Cult噏】余允抗豹隐30年首谈《山狗》：我逼到蛇佬癫咗！

cult片王《山狗》虐杀轮奸超变态　郑则仕仍然心寒：觉得导演痴线

电影《凶猫》系喺1987年上映，由刘家良、郑浩南、邓丽盈、王晶同徐淑媛等演出。故事就讲述刘家良系天师嘅后人，成个家族嘅使命系收伏一只为祸咗几百年嘅猫妖，而呢只猫妖就因为地盘施工而无啦啦冲出封印，之后不但到咗一栋大厦度大开杀戒，更先后上咗翁世杰同徐淑媛嘅身。癌症末期嘅刘家良同埋佢新收返嚟嘅徒弟郑浩南就打算用符箭收伏猫妖，可惜最后佢哋都系不敌猫妖，逐一身亡，而猫妖结局时仲冇死到兼上咗饰演警察嘅王晶身，绝对系一个Sad Ending。

其实呢套戏有好多地方好好睇，好似临尾被猫妖上身嘅徐淑媛喺差馆大开杀戒时，真系几令人觉得可怕。不过就算系咁，都真系比唔上《凶榜》，点解呢？或者余允抗本人可以畀到答案大家：“《凶榜》之所以恐怖，系因为观众去到后段先睇到只鬼，之前系唔知到底咩事；但观众喺《凶猫》里面好快见到只猫妖，所以冇咗一种对未知嘅恐惧。”不过《凶猫》里面都有一幕有呢种恐怖，就系电影初时郑浩南被妖上身嘅翁世杰追杀，中间撇甩对方嘅郑浩南，喺自己屋企度又见到翁世杰，但翁世杰完全冇异样，郑浩南放低戒心同对方讲头先发生咩事时，翁世杰先至认自己系猫妖，而我作为一个观众，就系喺怀疑紧翁世杰系咪猫妖时感觉个气氛好恐怖。

当然，套戏真系有好多处理得唔好嘅地方，甚至造成情节上嘅唔合理，好似明明刘家良得返几日命，点解仲可以咁精神去捉妖，而郑浩南同邓丽盈嘅感情线亦非常离奇，观众净系见到郑浩南非常倾慕邓丽盈，但冇耐佢哋两个就连床都上埋。我自己就觉得呢套戏比起余允抗嘅两大Cult片系失色嘅，但唔算难睇，你哋又点觉得呢？