古巨基演唱会跌落窿背脊落地　摸住颈安慰观众：我想继续落去

古巨基（Leo）呢几晚都喺红馆度为自己嘅《古巨基WE我们世界巡回演唱会香港站特别版》演出，昨晚首场就演出得好顺利，而且反应仲好好添。不过，基仔今晚嘅演出就发生咗意外，佢唱完两首歌后，就向后跌咗落台上，有现场观众就话基仔应该跌得几伤下，而基仔都几分钟后亦企返起身上台继续唱，之后佢摸住颈同一班观众讲咗番说话：“我想继续落去，系我自己唔小心，系我唔记得咗时光机个位，冇问题，多谢你哋愿意喺度等返我上嚟，我好想继续落去、我尽力继续落去，唔好吓亲大家，冇事嘅，行到。”佢亦都话想休息一阵，但冇特别休息到就继续唱，之后佢亦都系台上话自己系背脊落地：“不过一阵如果换衫位耐啲，跳舞梗啲，大家体谅下。”据知，完骚后基仔会到医院检查伤势，而今晚到场睇骚嘅嘉宾就有：余安安、蔡卓妍、陈慧娴、赵薇、吴浩康、杜徳伟夫妇、容祖儿、阮兆祥、陈豪陈茵媺夫妇、张颕康夫妇同赵增熹。