【栋仁的时光．任噏乱评】三大原因致剧集低收　唐诗咏被剧本累死

《栋仁的时光》终于迎来大结局，套剧好唔好睇相信大家心入面会有个答案，但有个标准就好客观，叫做收视。 喺《栋仁的时光》之前，《翻生武林》系2018年收视暂时第二低的剧集（第一名系《无间道》），首两星期只得23.4和21.8点，全剧平均22.25点。但《栋仁的时光》其实情况都类同，首两周收视只有23.1和22.4点，睇个走势都会继续跌，虽然未必可以取代《无间道》全剧得21.67点的地位，但代替《翻生武林》成为第二低收视剧集就好大可能性。

究竟咩事会搞到套剧咁？其实本身套剧嘅题材好好，一种会偷能力的超能力，近年外国英雄片盛行，当系超级英雄咁拍都系一条出路。可惜TVB根本无将重点放喺呢种能力身上，每次使用能力时都系轻轻带过，更加唔好讲用能力去做街头英雄，俾佢对付得最多嘅奸角都只系许家杰，成套剧嘅重点原来唔喺最大嘅焦点度。另外剧集好唔好睇，最重要是追看性，本剧最大悬念，亦即是扣住观众嘅“勾”，就系阿Sam(杨潮凯饰）嘅失踪，成套剧就系讲唐诗咏揾失踪老公，但剧集无放太多心思喺呢度，只系设计咗光酥伯伯（郑敬基饰）原来系杨潮凯，喂！大佬，而家班师奶都睇美剧、韩剧，见过成千上万嘅套路，睇两集就知郑敬基就系阿Sam啦，你唔会觉得会“哗”一声呀？所以早两集穿桥，都无人喺网上讨论，就知编剧呢个以为“惊世”布局，系有几失败。

第二个原因，TVB依然唔可以甩走旧有嘅一套，就系有太多爱情线。主线系袁伟豪、唐诗咏和朱晨丽嘅三角恋，加埋唔存在嘅杨潮凯，错综复杂嘅爱情线系一贯TVB嘅手法。明嘅，其实《栋仁的时光》条桥系唔错，但如果系一套５集剧，应该会好精彩，但２０集就要利用爱情线去拖，令到成套剧节奏好慢，５分钟讲完嘅剧情，用了多４０分钟去讲（扣除三节广告时段），所以有不少网友都话《栋仁的时光》最好睇系临尾５分钟。

其实《栋仁的时光》最大问题就系剧本，袁伟豪第二套担正做男一嘅剧集，号召力没有问题，之前《铁马战车》施马sir角色相当入屋，至于唐诗咏有人话佢未够班做视后，话佢做嚟做去得一个样，可能系大家潜移默化，觉得好戏就系喊到口水鼻涕出哂嚟，其实演得生活化先系最高难度，《栋仁的时光》致命伤系剧本冇张力、唔吸引，呢啲剧本就算你俾梁朝伟、张曼玉演都系死路一条。