谢霆锋爆出道被嘘至今上台仲惊紧　打拍子其实避紧水樽

由谢霆锋主持的ViuTV节目《锋味前奏》逢星期六播出，嚟紧𠮶集，谢霆锋会教导演火火煮“黑松露炒饭”。愈简单的菜式其实愈考功夫，霆锋同火火分享心得，“窍妙系时间同温度，我钟意落镬前，用手摵开啲饭，因为会容易炒好多，所以我炒饭经常戴住手套就系咁解。”

霆锋炒咗一阵，火火就接手，点知佢个煎pan愈炒愈歪，之后成个煎pan离开咗个炉，霆锋见到笑住话：“你移咗过嚟系冇火㗎。”火火话自己好多甩漏，问霆锋人生入面有冇遇到啲好大嘅甩漏，令到佢好唔开心，霆锋就话：“前一排我做咗个演出，出嚟个效果自己唔系好满意，知道自己可以再做得好啲，一路喺架车度忟自己紧接去咗另一个活动，系煮嘢食。我一直喺度谂：‘点解会咁？’、‘好忟呀！’，带住呢啲怒火入厨房，即刻切亲手。”

火火继续问霆锋：“行煮嘢食呢条路，会唔会好崎岖？有冇人冷言冷语：‘你无端端煮咩嘢食啫？摆明玩玩吓啦！懒有型！’？”霆锋话唔单止煮嘢食呢条路，佢出道头四年已经崎岖到不得了，“啱啱出嚟嘅时候俾人嘘！嘘咗四年，唱到今日，我而家上台都仲会惊㗎！哗！大佬！我𠮶阵时攞住个咪，个人喺度摇，我唔系摇紧拍子呀，我系避紧你哋啲水樽同荧光棒呀！已经系俾人闹到去呢个地步，梗系见过啲水樽飞埋嚟先咁摇啦! 所以有啲乜嘢未经历过吖。”

畀人嘘又掟嘢，有冇因为呢啲事而喊先？霆锋就话冇，不过就爆咗经理人霍汶希（Mani）因为佢而喊到猪头咁，“我落台嘅时候，见到mani喊，喊到抽搐，所以我要更坚强。”