【栋仁的时光】企跳李旻芳唔推Job好挨得：试过做替身俾虫𨅬上身
无线剧《栋仁的时光》播出以来反应都唔错，好多人都赞袁伟豪演得几有Feel，不过前晚嘅一集（第11集）里面，最抢、最出嘅唔系佢㖞，而系客串嘅李旻芳。剧中，李旻芳就因为感情同工作问题而喺天台度企跳，好在袁伟豪同唐诗咏及时开解到佢，阻止到佢自杀。好多观众都赞李旻芳做得好好，拍喊戏喊到鼻涕都出哂嚟之余，仲话佢电话闹爆变态老板系“食屎狗”呢一下做得好爽。而李旻芳本人都喺社交网站出Post，多谢一班观众咁支持佢。
【3日2夜】李旻芳主持惹负评 意见全收：节目前提自己唔好咁兴奋
李旻芳亦喺文中感谢喺佢背后默默支持自己嘅屋企人，特别系对佢无微不至嘅妈妈：“佢惊我冇啖好食，就每朝静蝇蝇咁将准备好新鲜嘅饭盒放在台面比我带返工，话系寻晚食净嘅，怕我话佢辛苦。”而佢亦都数咗好多事例出嚟，多谢妈妈一直以来静静鸡咁帮佢分担生活压力。
咁当初屋企人系唔系都好支持李旻芳入行？佢接受《香港01》访问时就咁讲：“其实佢哋好反对，妈妈同家姐都觉得好不设实际，可能系因为本身做紧空姐，都算系一份荀工，同埋佢哋觉得娱乐圈好黑暗，好似个大染缸咁。我同佢哋倾咗成晚，话只要我做好自己，保持自己原则，唔受他人影响，唔好走捷径，唔好贪小便宜，就唔会误入歧途同行差踏错。之后佢哋就放心畀我试一试，过一排后变得好支持我，因为佢哋知我仲系一个乖乖女。”佢仲话依家同妈妈出街时都会拖手仔，临返工时都会锡对方一啖先出门口。
李旻芳笑言妈妈不时都会问佢做得开唔开心：“佢话如果做得唔开心就唔好做喇，做唔掂可以试下做生意。”咁其实系唔系真系有过类似念头？佢话刚刚读完艺员训练班时真系想转行：“因为我觉得自己好冇用，好似乜都唔识咁，有啲人可能读演艺出身或者做Model，好习惯对镜头，但我呢方面好差，我对住镜头会好紧张。同埋个个都靓仔靓女，相比下我好普通，腿又唔长又唔幼。”
视郑丹瑞系恩师嘅李旻芳就好多谢对方肯拣佢入训练班：“我问过佢点解拣我，佢就话觉得我好挨得，而我都好肯定我好挨得，我从来都唔推Job、唔拣Job，好似之前试过做替身俾虫𨅬上身，做替身著泳衣，做替身危企喺天台边等等，我都冇谂过推，我觉得入得行就要咩都做咩都试，因为所有嘢都系要由低做起。”