杜汶泽扬威意大利影展　大晒流利英文

一提到香港艺人讲英文，大家应该记得连诗雅嘅“Rest in pieces”同埋邓丽欣嘅“I am very thanks them”，不过香港都有唔少艺人英文都好好，但系原来除咗谢安琪、陈奕迅、谢霆锋、陈法拉等，杜汶泽都讲得一口流利英文！

话说阿泽日前就飞咗去意大利出席乌甸尼“第20届远东电影节”，由阿泽执导嘅《空手道》喺影展期间举行欧洲首映礼，更荣获“网上票选最喜爱电影奖”，而阿泽就喺台上以流利英语发言，谓：“我要感谢所有喺我生命中出现嘅人，因为，因为我相信遇到嘅每一个人或多或少都能够启发到我，尤其是启发我拍呢部电影嘅人。呢部电影系关于失败同点样企返起身，我就经常遇到失败，但我永远唔会放弃，好多时候都会成功地企返起身。”

而呢番言论就获得大批网友大赞，但系佢就喺Facebook留言写道：“流利又未至于，不过香港人，中五程度，系咁上下啦！”不过其实由小学开始就读拔萃男书院嘅阿泽英文应该差极都有个谱，虽然会考得4分，但英文都有个B。事实证明咗，就算公开考试成绩唔理想，都唔代表冇出路，阿泽今次仲威到去意大利，只要唔好放弃真系乜都有可能发生。