谭咏麟作曲世界杯主题歌 十足《皆大欢喜》方便跳大妈舞？
撰文： 关颖贤
出版：更新：
第21届世界杯即将于6月14日喺俄罗斯举行，今届就由ViuTV夺得独家播放权，为咗令大家更加投入世界杯，ViuTV就特别邀请咗乐坛校长谭咏麟作曲同监制推出世界杯主题曲《我们的梦》，仲揾埋MC Jin填rap词。除咗有钟镇涛、许志安、梁汉文、陈晓东之外，宇宙G.E.M.都有份飙高音，亦出动到环球旗下所有歌手，包括陈慧娴、AGA、Gin Lee、Robynn & Kendy、周殷廷、麦家瑜、符致逸等，而和音就由明星足球队同晨曦足球队包办。
但系首歌听咗头几秒就已经觉得唔对路，谂住今年世界杯喺俄罗斯举行，可能唔多唔少会有少许民族曲风，又或者会系节奏强劲听完好热血，好似李克勤首《Victory》或者《我著十号》咁。但系呢首《我们的梦》听落觉得似70年代曲风带点中国风，啲节奏啱晒大妈喺广场跳十字步，感觉好亲切，好似睇紧《皆大欢喜》咁，如果家燕姐一齐唱就perfect啦！歌词亦好有校长嘅特色，不过最抢镜嘅都系MC Jin rap𠮶部份。
另外，主题曲都有邀请到俄罗斯籍嘅主持Artem Ansheles一齐唱，喺入面都加入咗几句俄文。但系似乎大家都对呢首歌感觉麻麻，有唔少网民就留言话不如直接改编俄罗斯方块首歌仲好，帮主题曲改名做《世界杯之皆大欢喜》之余，仲话呢首歌根本要揾埋家燕姐唱。喺呢个时候，不如听吓俄罗斯嘅世界杯主题曲对比吓啦！