爆肌人夫张继聪幸福肥暴涨？　凑女惊现大肚腩吓窒网友

撰文： 洪晓璇
出版：更新：
爆肌人夫张继聪不时喺戏中SHOW肌。（影片截图）
+2

好身材大家都想望多两眼，无分男女，近几年多咗好多香港男艺人爱上操肌，唔声唔声吓大家一惊，由张家辉、森美、陈豪到最近嘅陈奂仁，见到佢地嘅操练成果，简直觉得人生充满希望呀﹗张继聪都系爆肌人夫代表之一，点知呢日佢凑住囡囡Kakaball时，居然被眼利嘅网友发现佢身材走样，阿聪仲承认自己：“无错，我系重咗几十磅﹗”点解呀？

张氏一家四口去到球场享受家庭乐。（张继聪IG）

阿聪同谢安琪一向好重视两个小朋友，尽可能抽时间陪住佢地成长，呢日又一家四口出动去到球场，见到阿聪上载短片，留言话：“谂住‘的’番一两个钟系个囡（女）面前威吓，点知个波唔合作。”片中阿聪用强劲右臂抱住Kakaball，双脚一下一下咁“的波”，连续十几二十下，有姿势有实际架，Kay留言笑老公：“我觉得最尾果（𠮶）个尴尬笑几趣致。”到底呢句系耻笑定耍花枪呢？

张继聪亲认肥咗十几磅。（张继聪Facebook）
张继聪真系好勤力健身，成日喺健身室打卡。（张继聪IG）

喺Kay眼中充满幸福同爱，不过网友睇到嘅就多角度好多啦，好似：“留须好似希特拉”、“BB个样净系谂紧：爸爸你咁郁黎郁去我会呕嫁”，仲有位好眼利嘅网友话：“果（𠮶）个…唔会系…肚腩挂”。阿聪都好快咁作出回应：“将个焦点放系我个肚腩嘅朋友仔们，留意番，无错，我系重咗几十磅（为咗角色，我无悔）。”十几磅真系唔少嘢，随时将8旧腹肌变返做一旧，不过有心水清嘅网友留言话：“bulking呀 上紧磅增肌 再cut fat”即系先增肌再减脂，阿聪都即刻回应一句：“唔好话俾咁多人知呀。”仲继续操落去，唔通阿聪想变港版变型侠医？

世事都俾呢位网友睇穿晒啦……（张继聪Facebook）
一直训练落嚟，阿聪手臂纹身都已经拉阔唔少，再操落去可能会变16比9……（张继聪IG）