陆永囡囡原来系猫奴　妈妈无眼睇：出门口喊到好似畀人虐待咁

香港有唔少爱动物之人，无论养猫养狗定系兔仔仓鼠，都将宠物当成一家人一样，有小朋友嘅家庭更加可以从小培养佢地嘅爱心同责任心。陆永同太太Reina生咗两个可爱嘅囡囡Hannah同Simsim，家教相当好，细细个就自己坐定定食饭，最近屋企多咗两个新成员，Reina居然留言话：“今日出门口，阿sim喊到好似畀人虐待咁……”到底发生咩事？

回带去返两日前，原来Reina带囡囡到朋友家中探访，收养咗两只猫：“带Hannah去朋友屋企睇猫猫，朋友畀两只猫猫佢带返屋企。其实佢想带晒人哋屋企二三十只猫猫返嚟……”小朋友见到猫仔狗仔通常都好兴奋，玩完一轮要帮手照顾起居饮食时，又会推三推四，不过呢个情况就无发生喺Hannah同Simsim身上。

Reina呢日又上载两张相，Simsim瞓咗喺台底同两只猫玩，睇嚟佢哋同小主人已经建立起感情，就咁睇相冇咩嘢，不过Reina就留言道出真相：“今日出门口，啊sim喊到好似畀人虐待咁，佢话今日工人姐姐放晒假，担心bb冇人照顾……返到屋企佢话佢好忙，猫bb成日黐住佢，佢要陪猫bb。”估唔到Simsim四岁人仔已经咁有责任心，Reina仲加上Hashtag话：“两只猫b真系净系黐啊sim一个，佢哋三只嘢喺台底缠绵咗半个钟。”睇嚟以后陆永一家要出门都几难啦。