林芊妤教瑜伽有几好揾？　早已上车置业：月入有六位数

Coffee（林芊妤）出席ViuTV节目“Good Night Show全民星战”发布会，同场更有梁汉文、林敏聪、罗家英等艺人。讲到发布会中家英哥同Coffee有互动，更揽住佢玩游戏，Coffee笑言：“佢为咗气氛啫，家英哥系护花，避免林敏聪虾我，完全冇抽我水嘅感觉，OK嘅。”

讲到宜家甚少喺幕前出现，Coffee就话：“系呀，因为自己都想喺瑜伽发展，又想健康多少少，因为呢一行譬如话接剧，会日夜颠倒。而家时间上自己比较容易控制。”，Coffee讲到咁，莫非有意退出幕前？Coffee就话:“都算㗎啦，我都老啦，28岁啦，因为自己都入行早，不过如果有好机会当然会做，不过现时为止都以运动方面为主。”大家要好好珍惜电视上见到佢嘅日子啦。

相信大家都好好奇，Coffee教瑜伽系咪赚好多，Coffee接受访问时就透露咗个惊人数字：“收入好可观呀，都过20万一个月，不过当然有计埋其它收入，我一个人都打好多份工架，唔只是教瑜伽。”Coffee月入20万已经足以令佢成为小富婆，Coffee更透露自己一早已经买左楼，不过佢都仲有好多目标，更想继续置业。

Coffee与男朋友已经拍两年多，二人更有结婚计划，Coffee：“其实都有打算，都系签张纸好简单，自己唔系一个高调嘅人，唔需要大龙凤，宁愿用笔钱系结婚之后。”