【名校鬼故】某知名女校泳池前身系乱葬岗 麦明诗：非常猛鬼！
撰文： 关颖贤
出版：更新：
讲起香港猛鬼嘅学校，大家好自然就会谂起元朗嘅达德学校，但其实仲有好多学校都流传唔少鬼故，原来某传统名女校都几猛鬼，不过呢啲都系未重建嘅时候发生。该校由建校至今已经有150几年历史，喺香港咁耐历史，当然经过二次世界大战，喺日军占领香港嘅时候，被占用为宪兵总部。
相传被日军占用校园嘅时候，游泳池同埋小学部花园嘅位置都系刑场同埋乱葬岗。有该校嘅旧生就透露小学部花园好猛鬼，经常都会有同学仔玩摇摇板嘅时候受伤，而摇摇板隔离就有一形状奇怪嘅棵树。到夜晚黑向住𠮶棵树嘅树根讲“Cleopatra”，树根会缠住你，因为有个女仔被埋喺下面。虽然听落就好似Harry Potter啲情节咁，唔算恐怖，但系到夜晚自己一条友都唔会够胆试…
另外，亦听闻游泳池嘅池底形状好怪，泳池通常都系由浅到深慢慢斜落去，但系呢个泳池浅水嘅位置水只系去到腰间，然后就突然直插几米深，深浅差距好大。据知就系因为泳池较浅嘅位置因为再掘落去就会掘到骸骨。问到曾就读女校嘅麦明诗有冇听过泳池猛鬼，佢就表示听过某女校喺抗日时期被用作做乱葬岗，特别系泳池最猛鬼，谓：“夏天上体育堂都会游水，有听过有人被鬼猛脚，然后扯落水底，所以一唔小心会好易浸亲，好多同学都唔敢游去深水𠮶边。”相信大家都听过鬼节唔好游水嘅讲法，而人气少同阴气重嘅地方就更加容易遇到水鬼，加上前身系乱葬岗，怨气就相对地重。讲到呢度，就不其然谂起由洪金宝执导，元华、午马、张坚庭等主演嘅80年代经典恐怖片《鬼猛脚》，剧情就系一对通奸男女被浸猪笼之后做咗水鬼，然后发生一连串命案，而所有尸体脚上都有手指爪痕，谂谂吓都系唔好游水好啲...