【PUBG】男玩家入食鸡Group被老婆误会嫖妓 网民：彭于晏帮到你
撰文： 梁子健
出版：更新：
俗语话：“唔怕生坏命，最怕改错名。”
《PUBG绝地求生》个名明明正正常常，但基于游戏胜出后有“Winner Winner Chicken Dinner!!”一句，所以玩家们都帮呢只game改咗个花名叫做“食鸡”，仲同好多兄弟、机友一齐开WhatsApp Group约埋“食鸡”。
问题就嚟喇！有男网友指被兄弟add咗入“食鸡团”，点知佢老婆见到“食鸡团”呢3个字之后嬲到癫，以为老公北上嫖妓，于是执晒衫裤鞋袜返娘家。该男网友于是喺“食鸡团”话：“呢个Group可唔可以改名？我老婆以为我有个叫鸡团，而家嬲到返咗娘家……”之后佢仲想广集大家意见问点样拆解今次嘅离婚危机。
对于呢次“打咗铺机，输咗头家”惨剧，个老公看似水洗都唔清，但有好多网民都叫佢放心，仲好抵死咁建议：“同你老婆食返两铺鸡佢就明架喇！话唔定到时佢食得仲狼过你。”此外，亦有人指：“呢个世界或者只有彭于晏先帮到你，只要彭于晏开口解释咩系‘食鸡’，你老婆一定会信！”
点解揾彭于晏帮口解释‘食鸡’呀？其实好简单啫，因为彭于晏帮《PUBG绝地求生》拍咗个代言广告，喺广告片入面成日“食鸡”前、“食鸡”后吖嘛：“大家好我是Eddie彭于晏。在这儿，无论你是高手还是菜鸟都能找到属于自己的乐趣。各就各位，一起吃鸡。”
再唔系就直接俾老婆睇以下一篇文，直接了当讲清楚“食鸡”唔系叫鸡：
【PUBG吃鸡】彭于晏做代言全球大热 鹿晗吴亦凡林俊杰都系fans