【逆缘】夏文汐为忘年恋疯狂不合理　唔通为林夏薇黑化铺路？

两个人喺埋一齐最紧要简简单单、开开心心，毕竟社会上人与人的相处已经够晒复杂的了，如果对住自己另一半都仲要猜猜度度，咁就真系……

【感情最忌试探　翁芷荞仲要劲over】

呢个咁简单嘅拍拖相处之道，《逆缘》中的翁芷荞（夏文汐饰）无“奶油”唔知，话晒佢年纪唔细，又捞过娱圈大染缸，后生时又被福冈雅治（和泉素行饰）呃上床搞大个肚生埋庄司晨（林夏薇饰），感情上的阅历够晒丰富。翁芷荞之后又同汶莱王族有过关系，单系同王族有过交往呢一点，翁芷荞喺感情上就应该好识得拿捏分寸，更会知道最忌手段同试探，但佢竟然唔听汤泽澄（黎诺懿饰）电话，目的只系欲擒故纵、欲拒还迎，仲话：“故意唔理佢，睇佢咩反应。情场如战场，男女间嘅事有时都要玩吓手段，我咁做系想试探佢有几爱我。”

如果真系只为试探，唔听几次电话问题唔大，但做咗大半世人、阅历丰富的翁芷荞仍然唔识过犹不及，事关放大佢电话通话记录睇睇，足足无听男友汤泽澄电话87次呀！如果我系汤泽澄，头十个电话会以为翁芷荞工作忙紧唔得闲听，第二十个电话唔听会开始担心翁芷荞有意外，打到第三十次都唔听就会心谂对方应该系摄高枕头谂清楚唔想拍拖故意躲避，于是就唔会再打第三十一个电话去打扰。所以，汤泽澄足足打咗87次都算好好毅力架喇，翁芷荞仲觉得未够诚意？唔通要打足70个7次？

【爱情令人失去理性　翁芷荞爱得不可理喻　连个女都可以唔理】

其实翁芷荞都唔再系29+1啦，去到呢个年龄嘅人都只会好好把握时间享受爱恋，唔会嘥时间、心神玩手段，但佢偏偏玩到over晒，难怪汤泽澄之后飞咗去英国唔话俾翁芷荞知，因为根本联络唔到佢。不过，翁芷荞呢个时候睇到汤泽汶（何绮云饰）喺电视新闻上话：“我细佬拍拖可能系for fun”，并从而得知男友汤泽澄飞咗去英国后，就发晒烂渣：“之前讲到有几咁爱我，原来just for fun！”

直到汤泽澄回港后立即揾翁芷荞，两人再度见面，翁芷荞都只系识得怪对方：“你一下子玩失踪，一下子又玩深情，我无咁多时间陪你玩。”但诚如汤泽澄解释：“明明系你唔听我电话，唔覆我讯息。”俾在一般人，面对一个咁扭横折曲嘅人，即刻反面都似，语气绝对唔会好似汤泽澄咁好，但汤泽澄边解释边氹，而翁芷荞又真系三言两语冧返晒，仲肯即时跟男方离开香港，就连自己当初誓神劈愿话要认返个女庄司晨（林夏薇饰）嘅事都立即抛诸脑后，瘟仔要紧！

【一切只为庄司晨黑化铺路？】

以翁芷荞的角色背景、经历而言，佢喺感情上的言行真系有啲唔合理，更加偏向于似一个不谙世事、被宠坏了的少女。不过，如果话要塑造一个自私自利再度抛弃女儿的妈妈，从而逼使庄司晨黑化，咁就真系有啲无可奈何。

【逆缘】黎诺懿高富帅仲要肯花心思 难怪阅历多如夏文汐都被攻陷

【逆缘．龙羽居士】周星驰成名作靠佢执导 而家竟然做咗TVB绿叶