谢霆锋送8,500万豪宅俾谢贤　未够一年原价转名系悭税秘招？

揾到钱买砖头可以话系香港人理财定律，特别喺香港个个都以上车为目标，近年政府为咗减少炒卖推出唔少辣招，买楼要俾印花税，手上唔止一个物业又话要俾多15%，计落条数相当襟计。去年传出谢霆锋豪掷8,500万，买入浅水湾豪宅送俾爸爸谢贤，不足一年就被发现栋楼变返霆锋名下，咁就悭咗超过500万税款，可以买多层楼啦。

上年5月传出霆锋一掷千金，以8500万购入浅水湾豪宅怡峰（The Somerset）送俾爸爸谢贤，呢个低层A室单位，实用面积1,939呎，呎价达4.3万元，拥有深水湾及浅水湾双边海景，外间大赞霆锋真系好孝顺。估唔到不足一年豪宅已经易主，新主人竟然系霆锋﹗根据土地注册处资料显示，怡峰低层A室，去年5月中以8,500万港元成交，由谢家钰（谢贤原名）持有，到今年4月初，该单位的登记买家已改为谢霆锋（TSE NICHOLAS）。大家都好奇点解四哥原价会卖楼俾个仔呢？

原来呢个做法叫做直系亲属转让，系近年唔少人买楼悭钱嘅做法。2013年政府推出双倍印花税，拥有本地住宅的本港居民，购入另一所本地住宅时需缴付双倍印花税，假如是直系亲属转让住宅物业，可以豁免额外印花税、双倍印花税及买家印花税，但仍要按一定规则缴付旧印花税。霆锋手上有唔少工商舖位及住宅，如果上年佢自行买入单位，就要俾15%近1300万，而家由四哥转让俾佢，上年同今年两次交易税款加埋七百几万，咁就悭咗五百五十几万啦。