【蜗居】粉红屋男户主指高达无事会再执屋：风尘味重无得留低

网购而家几乎人人都识，小至平时买衫裤鞋袜，大至婚礼布置婚纱西装，要自己买材料又有几难？不过买到返嚟点配搭就唔系人人都识啦。呢个星期TVB节目《蜗居宅急变》，引起极大回响，其中一集将小蜗居变成“烈焰红唇粉红博物馆”，令大家同男户主一样睇到眼都突埋，网友大闹女户主借机掉晒老公d玩具甚至进行起底，男户主终于忍唔住企出嚟护妻，澄清玩具原封不动喺屋企，同时直斥制作单位靠害：“我想讲我老婆系钟意淡粉红而唔系桃红啰﹗佢地根本买错哂颜色...”

岑应主理嘅节目，Queenie出镜率实在高，唔知点解由美容达人变咗做家居达人，呢次粉红部屋又系佢嘅杰作，话就话“Cheap but Stylish”，不过Stylish咗喺咩位呢？似乎无乜人识欣赏。呢次Queenie听到女户主钟意粉红色，就话要搅间“烈焰红唇粉红博物馆”，男户主开门𠮶下个样灰到一个点，连日嚟舆论压力令男户主要爆啦，上网留下长文回应。

男户主澄清老婆无掉佢啲珍藏，闹爆TVB呢次靠害：“我作为老公都满足下老婆少少心愿系装修度整得粉红少少有咩问题？同埋我想讲我老婆系钟意淡粉红而唔系桃红啰﹗佢地根本买错哂颜色..……”一路睇个节目都以为自己眼花，乜呢只系粉红色咩？原来真系买错……男户主仲好有耐性回复提问，好似网友问：“师兄有冇觉得间屋好似一楼一？”男户主话：“讲真我都觉得似，如果唔系节目度都唔会咁既表情”仲话自己入屋时反应系真情流露﹗不过千错万错都唔关老婆事，佢仲大赞老婆一直好支持自己储玩具。

“见大家咁关心我个柜，我就系度同各位师兄报平安先！我个柜连入面既玩具以至于杂物房入面既收藏全部原封不动无郁过，本身我无谂住出声，但实在太多未审先判既师兄们不断出post或留言中伤我最爱既人，所以我不得不出此post证明我老婆并非你地心目中既人！我想讲佢一路好尊重我既兴趣，家中既玩具全部都系我老婆送比我氹我开心的，识我既人都知我每次收到呢d礼物都会放上fb放闪绝无虚假，试问一个肯送呢d贵重玩具比另一半既女人点会系你地口中既人？”最后佢话改造完之后其实会再执过：“屋企既布置方面我会再行处理，我地都觉得ok既会保留，风尘味重既都唔会有得留低。”叫大家唔使担心啦。