【专访】前有线主播曾美华育儿有自己一套：其实我系Lazy Mum

前有线电视主播曾美华（Carman）虽然已经离开咗新闻直播室，但间中都会返娘家开工，继两年前同仔仔女女出埠拍《带阿B去旅行》，最近佢便为奇妙电视节目《小店大厨 - 台湾篇》介绍当地美食。Carman笑指自己主要是饮饮食食同《小店大厨 - 台湾篇》打卡影靓相：“最正系食虱目鱼肚、鱼丸，好抵，港币8.5咋！”同小朋友去旅行开心啲定系自己一个？佢就咁睇嘅：“带埋仔女去旅行就难打卡影靓相，但系有埋佢哋会开心、温馨好多。”

自从2011年Carmen下嫁黎智英次子黎耀恩后，好多人都开始话佢系“幸福少奶奶”又或者“阔太”，但佢就话其实唔多钟意呢啲称呼：“就算系‘最美丽女主播’呢啲光环，我都系唔钟意，明明我已经唔系做紧主播，曾美华就系曾美华。”而佢亦都觉得自己系需要工作：“我钟意玩，做唔到全职妈妈，呢个世界仲有好多嘢可以试，同埋返工可以到小朋友榜样，等佢哋知返工先至可以有收入。比起High Tea、Shopping，我钟意去旅行多啲，我希望仔大女大后可以做一次背包客，呢个都系我Bucket List其中一样嘢。”

相信好多人都会觉得Carmen嫁得好好，老公好锡佢，又有大屋住，又凑够一仔一女，其实佢自己都咁觉得：“真系感恩，特别系有一对小朋友系好Complete Your Life。”咁会唔会有啲点样嫁得好嘅贴士？佢就咁答：“其实系百客爱百货，百货应百客。有啲人好钟意我呢种性格，有啲人就觉得我太大癫大肺、唔够庄重，你永远唔知咩人钟意呢种人，呢啲系缘份嚟。其实拍拖又好，结婚又好，都唔系最难嘅一部分，之后经营婚姻先系最难嘅部分，特别系女人生咗BB后，好似‘脱胎换骨’咁，成个人脾气暴燥咗好多，明明冇嘢要嬲老公，但好似睇佢唔顺眼咁。”所以佢好开心老公好识得包容、体谅佢。

讲到Carman大仔依家五岁半，囡囡四岁，佢就话其实佢两个都好好凑，不过系比较有主见啲咁：“用玩具、食物系氹唔到佢哋，一定要讲道理先肯听你讲。”至于有咩凑仔心得，佢就笑指自己其实系个Lazy Mum：“我自己就钟意‘放手’嘅，唔钟意系咁带小朋友上兴趣班，就算去上堂学法文、韩文、日文，都唔及带佢去旅行，亲口同人讲‘Kamsahamnida’或者亲眼见识巴黎铁塔。”

咁会唔会生第三个？Carman就话唔会喇：“其实系对香港有少少失望，特别系教育制度，好多方面都系扼杀紧小朋友嘅创意。我系填鸭式教育出嚟，我唔希望我嘅小朋友变成填鸭，所以我畀小朋友读国际学校，但系系最平𠮶只，我唔想佢哋有所谓读贵族学校嘅光环。或者有人会觉得咁都好离地，但我觉得小朋友系应该要成长得开开心心、冇压力。”