【年年18岁】汤怡摷返当年中学校服　学生妹造型街访无违和

最近陈家乐跳入电视圈，喺剧集《逆缘》中嘅表现令人眼前一亮，大家先惊觉原来佢已经入行十年。其实同公司嘅汤怡就更加夸张，2006年参加《美女厨房》中美少女厨神选举，被冠以“少女黎姿”称号，话咁快已经过咗12年，估唔到最近汤怡揾返套中学校服出嚟拍摄做街访，条裙劲啱身仲要毫无违和感，点睇都唔似30岁﹗

“学生不应谈恋爱”呢个老生常谈嘅话题，听就听得多，遵唔遵守就系另一回事啦。最近汤怡走上街头揾市民做街访，问下大家读书时有无追求者/追求人，街坊嘅答案都系大同小异，最吸晴嘅都系汤怡本人，事关佢揾返当年套中学校服出嚟，完全啱身唔使改，气质好PURE好邻家呀﹗连做紧访问时受访者都不禁望住佢大赞好靓女，汤怡不禁留言话：“我中学嘅时候黑过嚿炭……”睇埋佢张学生相，真系不禁讲句果然愈大愈靓女。

入行以嚟汤怡一直走邻家女孩路线，储落好多粉丝，系众人心中嘅女神。由于佢经常孖住同公司嘅陈家乐拍摄，早几日汤怡上载同陈家乐嘅合照留言话：“有人问我地系咪拍紧拖？似咩？似咩？咁好笑嫁咩？识左咁多年先黎搞啲咁嘅野？不过咁影又几似嘅哈哈﹗”虽然张自拍系几似，但大家唔好忘记正印男友系洪卓立先啱呀﹗佢地拍咗足足11年拖啦，不时分享拍拖点滴，仲建立咗个专属Hashtag “#大洪小怡”，唔怕俾佢地晒亲嘅就去相啦。