【金像奖】欧恺淳冇机赢新人奖？　邓月平：6句对白好难睇到演技

今届金像奖嘅“最佳新演员”除咗凭《黄金花》入围嘅凌文龙同《蓝天白云》嘅梁雍婷两大热门外，其实其余三位入围者都不容忽视，包括《小男人周记3之吾家有喜》邓月平、《春娇救志明》欧铠淳同《杀破狼‧贪狼》陈汉娜，其中邓月平自觉冇机赢奖，而佢亦都对欧铠淳凭6句对白入围有所睇法。
场地提供：M2 Home

“第37届香港电影金像奖颁奖典礼”听晚就正式举行，当然焦点都系落喺“最佳电影”、“最佳导演”同影帝、影后身上，不过对好多初踏影圈嘅新人嚟讲，以上嘅奖项都真系遥不可及，离佢哋最近嘅都应系“最佳新演员”呢个奖。今年，凭《小男人周记3之吾家有喜》入围嘅邓月平（Larine），就同欧铠淳、陈汉娜、凌文龙同埋梁雍婷争新人奖。

Larine接受《香港01》访问时就觉得自己冇咩机会拎奖，亦话自知唔系大热，所以非常轻松：“我支持凌文龙同梁雍婷，呢个奖都系佢两个争架喇！”讲到欧铠淳凭6句对白就入围，Larine就有自己睇法：“佢系一个好好嘅女仔，6句对白系好难睇到佢演技，我相信佢拍戏份比较多嘅戏，一定会睇到佢嘅实力。”所以欧恺淳冇咩机会？佢就咁答：“我觉得我自己冇机会啲。”

其实《小男人周记3之吾家有喜》都已经系一年前嘅作品，翻转头睇返自己𠮶时嘅演技，Larine就咁觉得嘅：“𠮶时识嘅嘢冇依家咁多，但系都系倾尽100%嘅力量做出嚟，咁依家当然仲有好多嘢改善。”佢亦都好感恩入行冇耐就可以接触到郑丹瑞、罗家英等前辈，所以会继续努力赚取观众认同。讲到佢入行已经一段时间，Larine就话开始习惯：“电影本身系好迷人，但娱乐圈就商业味重啲，有试过有唔开心嘢，但依家已经唔记得哂喇！同埋入咗行后系开心嘢比较多，最起码识咗好多朋友，我发现大部分演员喺镜头后比镜头前更加吸引。”