Halsey暗示曾被性侵　走出阴霾后鼓励女权

现年24岁嘅美国歌手Halsey两年前同格林美得奖嘅DJ组合The Chainsmokers合作推出〈Closer〉一炮而红，之后再唱〈格雷的五十道色戒2〉﹝Fifty Shades Darker﹞插曲，更于去年第45届美国音乐大奖﹝AMA﹞中，获得两个提名。言行一向大胆嘅Halsey早前接受外国传媒访问时，亦不讳言向外界承认自己系双性恋，同时因为唔想大家讨论自己嘅性向，而把心一横剪短头发，最近仲大方公开同饶舌歌手男友G-Eazy热恋中。

但系风光背后眼泪又有边个知？原来Halsey身世都几惨，成长喺种族融合嘅家庭，爸爸属非裔，妈妈系白种美国人，自细就面对住种族分歧，曾因与父母吵架而被赶出家门，于17岁嘅时候服药自杀，并确认患上躁郁症。早前Halsey出席女权活动NYC Women’s March上，进行演讲时以过来人身分同大家分享过往经历，佢喺演讲词中暗示于2002年时，曾经被妈妈朋友嘅儿子性侵，个原文就咁嘅：“he says that he’ll teach me to play the guitar if I just keep quiet. And the stairwell beside apartment 1245 will haunt me in my sleep for as long as I am alive. And I’m too young to know why it aches in my thighs.”大概意思就系，佢话只要我保持安静，就会教我弹结他，1245号公寓旁嘅后楼梯喺我睡梦中缠住我，而我当时太年轻而唔知道我胯下会如此疼痛。

佢忆起20岁初出道时，在公开演出前下体出血流产，但因为唔想放弃难得嘅演出机会，而顶硬上著住成人尿片同服食止痛药上台表演，而当时自己都唔知道怀有身孕，其后先知道患有子宫内膜异位症。Halsey直言虽然现时有个好锡自己嘅男友，但仍然后惊再患病，所以希望所有女性懂得保护同重视子宫健康。