大S徐熙媛亲证怀有第3胎　上月癫痫复发健康状况成疑

做妈妈真系一啲都唔容易，生BB就好似到鬼门关走一圈，上个月忽然传出大S徐熙媛，癫痫复发晕倒需要送院留医，有指因为大S诞下第2胎时注射过量麻醉药减低生仔痛楚导致癫痫，至上个月感冒未愈再次引起癫痫复发，同时亦传出佢怀孕嘅消息，呢日大S回应台湾传媒查询时亲认：“还没满3个月啊！”汪家年底又添新成员啦。

自2010年结婚后，大S同汪小菲先后诞下一对仔女凑成好字，去年6月大S出席丈夫台湾酒店开幕时曾经讲过，为咗身体健康唔会再生BB，仲同汪小菲倾过要做结扎手术，估唔到话口未完又有咗啦。大S回复传媒查询时亲证怀孕7周，推算落嚟BB年尾会出世，不过似乎佢自己都有啲担心，因为上一胎癫痫被送至加护病房，加上已经41岁属高龄产妇，真系要事事小心呀。