【果栏中的江湖大嫂】陈炜冇桃花赖黄光亮？　拎住榴梿答好重杀气

无线剧集《果栏中的江湖大嫂》今个星期将会踏入结局篇，演员捉紧最后宣传，出席名为“果栏终极任务”嘅宣传活动，除咗喺现场同大家玩游戏之外，歌手谭嘉仪更喺现场唱出剧集主题曲。今日出席演员包括：陈炜、黄光亮、冯盈盈、江嘉敏等。

今次黄光亮有靓女拍挡陈炜陪住当然唔舍得啦，但炜哥讲到︰“冇得唔舍得㗎，好难得㗎，佢每次拍完都话唔再拍啦，但一反应好呢佢就话下次再合作。”炜哥就透露自己日日都要工作，其实感情方面就好难识到男仔，不过黄光亮喺身边就抢答︰“识咗我仲唔够呀，想死呀。”炜哥无奈表示已经被霸住。

同场江嘉敏都在场，今次佢嘅“邻家女孩”形象深受欢迎，但对于佢自己嚟讲，呢个形象用三个字嚟形容：“呃到人”，喺剧中饰演煮嘢食好叻又听话，对于听话就唔否认嘅，不过煮嘢食嚟讲江嘉敏就话自己洗碗叻啲。作为女仔总要识整几味嚟冧另一半，江嘉敏就话自己整甜品就几叻，问到咁当初男友觉得佢整嘅甜品点评分，佢就答︰“佢实话好食㗎，你试下话唔好食吖！”

身为新一代女神又有“邻家女孩”感觉嘅江嘉敏，感情状况当然受到大家关注，Kaman直言多咗粉丝系真，但追求者反而冇乜，可能自己本身男仔头性格。咁睇嚟各位男士要多多努力，大家仲有机会。