郭富城为破自己纪录搞百场巡回演唱　竟然连最爱都可以放弃？

天王郭富城、邝美云同江美仪等今日喺荃湾出席“单手掌上压挑战闭幕礼”，见证300位纪律部队成员刷新一分钟最多人同时做单手掌上压嘅健力士世界纪录，借此呼吁市民帮助被遗弃动物。《寒战》中做警队一哥嘅城城，就同警务处行动处处长邓炳强同台，城城就笑指自己戴黑框眼镜系模仿邓处长。到佢哋两个上台颁奖时，佢两个都非常搞笑，其中城城就话自己如果唔做演员或者歌手时，已经当咗差，而邓处长就咁讲：“我唔当差都可能做咗演员。”

城城受访时就话自己真系有谂过当差，仲笑指自己拍《寒战》入戏太深：“今日见到真正嘅处长系缘分，企喺佢隔篱好似同佢系同事咁，当时拍《寒战》做最年轻嘅警务处处长都好享受，做到咁高职位好受人景仰，保护市民有份英雄感同责任感。”至于会唔会畀囡囡Chantelle做女警？城城就咁答：“到时先话你听，太遥远嘅事。”

提到城城准备嚟紧嘅100场巡回演唱会，佢就话保持体能好重要：“今次系自己体能上嘅极限挑战，今次100场，要3年嘅时间去保持状态，系辛苦啲，但系我愿意接受挑战。”会唔会有机会破张学友147场嘅纪录？城城就答：“纪录系自己破自己，做到100场自己都好满意。”

为咗破自己纪录，城城牺牲都好大，佢就话自己为咗咁而放弃自己最爱嘅麻辣火锅，仲要戒足三年咁话：“要成果就要付出同牺牲，愿意放弃麻辣火锅，又会戒糖、盐、油，同埋每日只可以饮一杯咖啡。人生有好多挑战，当中健康是最重要，所以I am OK。”怕唔怕做巡演时唔舍得老婆同个女？城城话：“我又唔系去3年唔返，唔怕嘅，到时佢已经3岁，应该已经识唱我嘅歌，系开心嘅一件事，我要做一个好榜样，要努力认真工作，不断突破自己。”