罗力威雨侨笑住结婚喊住瞓　居然为咗一罐鲍鱼？

罗力威和雨侨正式成为合法夫妻，佢地由朝早注册、午宴，到晚上同亲友嘅婚宴真系忙足全日。罗生罗太一直话要开心笑住享受婚礼，全日都无喊过，估唔到返到屋企，雨侨为咗罐鲍鱼爆喊：“我喊到成个小学生抽搐咁样。”到底发生咩事咁严重呀？

罗力威雨侨结婚慧眼订靓场　回礼劲特别：同大家分享罗家口味

婚礼当日天公造美，罗力威雨侨于婚宴户外草地晒到变烧猪，皮肤都变成两截色，紧接又频扑去晚宴，不过一切都系幸福同快乐。一对新人返到爱巢估唔到仲会发生意料之外嘅事，阿威笑住分享：“夜晚两、三点番到屋企好肚饿，阿侨煮个面俾我食，谂住简简单单开罐平鲍鱼，煮完出嚟原来开咗我罐‘镇山之宝’，因为个鲍鱼好大只，我哋两个又食唔晒，跟住佢觉得自己好似做错事，喊住食个鲍鱼公仔面。好搞笑呀，全日大家都开开心心，估唔到夜晚喊住瞓。”

阿侨就话：“我喊到成个小学生抽搐咁样，我觉得好对佢唔住，开咗佢罐‘镇山之宝’，其实我觉得好唔好意思，因为一番到屋企我好想慰劳吓老公，煮个面佢食，点知煮出嚟个鲍鱼仲大只过佢碗面，大家又食唔晒。搞到而家成个礼拜都要食鲍鱼，佢而家一起身就要食鲍鱼啦。”呢个爆喊理由都真系相当特别呀。

雨侨罗力威欧式喜帖曝光　经典品牌婚戒惹女士羡慕【多图】胡杏儿御用星级影楼　雨侨罗力威森林婚照原来喺香港影

罗生罗太中午举行西式午宴同朋友同事分享喜悦，最搞笑系雨侨得戚表示，终于可以喺老公面前证实到自己嘅“身份”：“我同我老公一路都有个笑话，就系大家对对方嘅过去都成疑，我哋识嘅时候都廿几岁，佢成日话你系咪真系有读大学架？唔见你啲同学嘅？你系咪篮球队架？咩合唱团全部都唔见有、又冇相，到㖊日啲旧同学嚟晒，我就可以证实到我身份啦，佢唔系娶到个特务，但我对于我老公嘅身世仲系成谜，因为佢嘅长大喺新西兰，我仲系冇见过佢任何一个同学同老师。”