【任噏乱评‧VR驱魔人】有人情味就够？王贻兴刘翁犯咗新导演通病
电讯魔童王维基放弃继续申请电视牌照，虽然可以话系意料中事，但呢件事对一班仍然心爱港产剧集、电视节目嘅人嚟讲绝对唔系一件好事，最起码咁样系意味住再冇巨人可以撼动到另一个巨人。不过，仍然有一班人唔相信命运，仲觉得有啲嘢系值得做、应该做，就好似王贻兴、刘翁（Sunny）两个咁，最近佢哋两个就自编自导自演咗一连廿集嘅ViuTV新剧《VR驱魔人》，过去𠮶两晚就已经播咗两集。
喺呢套号称“可能系史上最多串星”嘅剧集里面，贻兴同Sunny就饰演返自己，做一对四围扑水谂住开港产恐怖片嘅好兄弟，但一班老板净系对“VR驱魔”呢件事有兴趣，所以佢哋两个就发现呢件事其实有商机，然后就周围揾人戴呢个VR装置，以帮人捉鬼嘅名义呃人钱，但中途却误打唔撞咁帮咗好多人解开心结，而头两集佢哋就先后向饰演Sunny舅父嘅葛民辉同埋饰演妓女嘅邓月平（Larine）埋手。
听落就好似几吸引、好有港式人情味咁，但实际上系唔系咁嘅一回事？斋睇头两集就真系争少少喇，特别系第一集里面存在住好多沙石，有好多方面都可以做得更加好。我好明白呢个故事里面有好多嘢都好值得交代同舖陈，但系作为一个创作人亦都要识拣当中有边样嘢系最值得讲，唔应该太过贪心，如果唔系就会因为样样嘢都讲而搞到成件事都到喉唔到肺。
最明显嘅例子就系喺第一集里面，饰演贻兴婆婆嘅余慕莲话贻兴因为拍咗《谜》而畀人笑足咁多年，而贻兴就应承余慕莲会畀心机揾钱等佢可以住大屋咁。其实呢一幕系第一集最好睇嘅一幕，因为贻兴可以话系完全真情流露，更透过呢一幕同现实已经离世嘅婆婆隔空对话，好可惜呢场戏对于成集搞VR见鬼、揾葛民辉做白老鼠嘅剧情系毫无帮助，硬生生加插咗呢一部份，成件事有啲突兀之余仲走走哋Tone。如果真系好想讲呢一Part，就应该独立用一集嘅时间去发展呢条线。
另一样嘢亦都系好严重、好影响到第一集嘅观赏感受，就系贻兴、Sunny花咗唔少嘅时间同篇幅去自己抽自己水。对于认识佢哋经历嘅人嚟讲，呢啲真系一两句就已经好足够；对于唔清楚佢哋背景嘅观众嚟讲，佢哋更加系想睇套剧嘅剧情本身。不过，上面讲过嘅情况喺第二集已经改善咗好多，最值得一赞嘅系林兆霞（即系《志明与春娇》系列嘅Brenda）嘅亮相极其恰到好处，成件事嘅搞笑程度升咗几个Level，虽然之后Sunny变咗著僵尸衫吓人好冇头冇尾。
到底系咩因素导致成套剧硬系争啲咁？其中一个原因一定系贻兴同Sunny都当正今次《VR驱魔人》系最后一次咁做，可能就系因为咁，所以就好想将可以摆到嘅嘢都尽量放落套剧里面，喺修剪一啲旁枝末节上变得冇咁谨慎，依呢个问题经常喺一啲新晋导演嘅首作里面揾到。第二个原因，可能系呢套剧实在有太多艺人帮手客串，如果唔畀返适当嘅播出份量佢哋好似对唔住佢哋咁，最后就搞到多咗啲可以删减嘅画面。其实外在框架结构都可以系一个原因，始终喺不足半个钟嘅时间里面，交代要交代嘅嘢系一件唔容易嘅事。
虽然好似踩得好尽咁，但其实大家都好应该继续支持呢套作品，点解？就系因为呢套剧有一份属于香港人独有嘅人情味，虽然两个主角都系市侩底，但你会喺佢哋身上揾得到香港人应该有嘅勇气同埋良知，就好似即使贻兴好惊鬼，都鼓起勇气冲入Larine“开工”𠮶间房，帮佢拎走佢死咗嘅男友留低畀佢嘅波鞋咁。对于有Heart嘅人，佢哋需要嘅系支持，随住第二集嘅处理手法变得成熟同爽快，相信之后嘅集数都会愈来愈好睇，畀次机会佢哋两个，亦系畀次机会ViuTV，同时都系畀次机会自己。
想睇更多评论？即Click↓