【开心速递】KC同Helen感情最凄美 不断错过加失忆桥段似足韩剧
“祈求天父放过一双恋人……”《爱‧回家之开心速递》中的KC同Helen好不容易终于知道对方心意，Helen甚至为了KC愿意放弃前夫嘅100亿遗产，正当佢哋打算排除万难都要在一起时，KC却因为先被John(何启南)打晕，后被一粒鱼蛋打中前额陷入昏迷，脑部受到重创，苏醒之后变成一个智商只有5岁嘅小朋友“聪聪”。
眼见即将“有情人终成眷属”，但KC竟然变成咁，不过Helen都没有放弃，扬言可以终生照顾聪聪。咁都OK吖，起码两个人仲可以喺埋一齐，但编剧又点会咁容易放过佢哋。KC因为同Jenny推撞再次撞亲个头变返正常人，仲喺公司简布会上口若悬河，非常精灵，正当大家以为呢次真系守得云开嘅时候，KC竟然忘记晒同Helen嘅感情，仲对佢表现嫌弃，令Helen非常伤心。
KC同Helen嘅感情线可以话系《开心速递》中最凄美的。由一开始两人因为寂寞走在一起，做对方的Sex partner，渐渐Helen对KC产生真感情，为咗留喺佢身边，即使明知对方成日走去沟𡃁妹，只把自己当作后备，佢都哑忍，直至后来KC发现Helen系先佢嘅真爱。
天意弄人，Helen此时被告知前夫留咗100亿遗产畀佢，但条件系60岁前唔可以同异性拍拖。KC和Helen起初为了这100亿遗产而转做地下情，奈何无论佢哋去到几偏僻嘅地方，都逃唔过遗产执行人John布下嘅线眼。两人最后也忍痛分手，KC默默地为Helen付出，包括假扮佢嘅钟点工人照顾佢，与将死嘅富婆司徒独孤明珠一齐，不惜被佢虐待，被大家看笑话被误会，只为继承其50亿遗产，可以早日同Helen复合。
KC和Helen即使分开，仍然心系对方。KC以为只要尽快赚到50亿，就有足够嘅实力和安全感，令Helen放弃100亿遗产，返嚟佢身边。其实佢错了，对于一个女人来说，一个有情郎比100亿更加贵重。但碍于KC永远只系默默付出，又不断令Helen产生误会，以为二人感情已经终结，对佢死心。到近日Helen终于自Terry口中得知KC原来为咗自己牺牲咁多嘢，毅然放弃100亿遗产，仲签埋放弃遗产同意书以示决心。KC听到Helen嘅决定，即刻冲去揾Helen，期间波折重重，眼见临门一脚，KC晕倒于Helen屋企楼下。
呢种男女主角不断错过嘅剧情，真系同韩剧剧情同出一辙，永远都系两个一开始系欢喜冤家，到两个真系情投意合之时，总要佢哋经历各种波折。而失忆都可以算系永恒上榜嘅剧情，例如有《天国的阶梯》、《冬季恋歌》、《秘密花园》，仲有去年大热嘅《孤单又灿烂的神——鬼怪》中嘅池恩卓，都系其中一方失忆。不过通常最后都系大团圆结局，所以相信KC同Helen最后都会有情人终成眷属嘅！