【果栏中的江湖大嫂】冯盈盈遭御用强奸犯强暴？李天翔获赞好好人

TVB有唔少御用角色，除咗有李国麟做“御用败诉王”、宣萱做“人质王”之外，仲有李天翔都系为人所熟悉嘅“御用强奸犯”。昨晚剧集《果栏中的江湖大嫂》就预告李天翔疑似将“又”要强奸人，今次对象系冯盈盈（Crystal）所饰演嘅小狼女。

李天翔入行20多年，早年因为认字特警一角而为人所熟悉。自2008年起，李天翔开始于剧集中担任奸角，更因为经常饰演强奸犯角色而被标签“御用强奸犯”。李天翔虽曾经表示演强奸戏“驾轻就熟”，亦因为佢在剧中强暴过嘅女演员多数都系一线花旦，令佢背负一个“强奸了全电视台女演员”嘅“罪名”，外人可能觉得佢艳福无边，但李天翔就叫苦连天，呢个身份令佢非常尴尬，亦系佢之前决心向TVB提出转为兼职演员嘅原因之一。本来以为转做兼职演员有更大的自由度，甚至可以将“御用强奸犯”呢个头衔写进历史，但今次好似都系走唔甩，要再做强奸犯？

同李天翔喺《果栏》中有大量对手戏嘅Crystal，接受《香港01》访问，佢话有听闻过李天翔是“御用强奸犯”，而对于强奸戏份则大卖关子，不过佢就对呢个拍档赞口不绝，话佢系一个非常专业同有气场嘅演员，“我第一次见到天翔真人行出嚟，我已经惊到脚都震埋，有啲场口佢要大声喝我同闹我，我要唔可以退缩同埋要好有气势咁顶返转头，但其实我内心眼泪鼻涕都想流出嚟，佢嘅气势真系好劲，畀佢喝一喝，我已经争啲跪低，但个样要扮到好有信心咁，其实真系好～难呀！”

Crystal话虽然天翔埋位时气场强劲，但镜头外嘅佢其实好亲切，Crystal仲多次大赞佢好人，“今次系我第一次拍剧，所以我好紧张，有时想喺片场影吓啲花絮相做纪念，但又唔够胆，又好怕丑，天翔知道我唔够胆影相，佢一得闲就拉埋我一齐合照，又有时我拍紧，佢得闲嘅时候，佢好好心咁帮我影花絮，等我有相Po吓，佢真系好好人。”

除咗帮Crystal影多啲片场相留念，天翔都有教佢做戏，Crystal所演嘅小狼女大获好评，应该都要Credit返天翔，“有好多好长嘅独白，我第一次拍剧，我真系唔知点去分析剧本同演绎，天翔系逐段逐句咁教我，用咩语气去讲对白，边度系高潮位，边啲位要加感情，佢真系好好人，虽然天翔畀大家喺‘强奸’方面嘅印象好深刻，觉得佢好恶，但其实佢好好人好亲切。”