Youtuber屎莱姆淘宝买过期空气：买呢样嘢嘅人神经有问题

网络红人屎莱姆成日都拍淘宝开箱文，今次佢喺淘宝淘咗样嘢，令佢自己都觉得不可思议，不知所谓，点解自己会走去买呢样嘢，佢今次开箱嘅系购自淘宝嘅“空气”。

屎莱姆喺影片中话佢所购买嘅系来自加拿大洛矶山脉的“纯净空气”，当中21%系氧气，79%系氮气同其他无意义气体。每一罐空气售价129蚊人民币（约港币150元），以每罐8升计，即系差不多一啖1蚊，屎莱姆话觉得用百几蚊买呢罐嘢嘅人神经都有啲问题（即系话紧佢自己）。但最令佢崩溃嘅系，佢骇然发现罐空气已经过咗期整整一年，佢自己都忍唔住话：“我畀百几蚊四罐空气已经够傻，仲要系过期嘅？”

睇返淘宝，除咗呢啲加拿大空气，仲有来自日本富士山同内蒙呼伦贝尔嘅空气，当中最平，销量最高嘅系内蒙呼伦贝尔嘅空气，58蚊人仔一罐，第二罐一蚊，都有二百几个交易。而淘宝卖家仲贴心建议可以将呢啲“空气”用作日常呼吸、旅游纪念品同创意送礼，妈咪呀，真系好惊圣诞联欢会抽到呢啲“新鲜空气”。