周杰伦余文乐香港街头揸AE86现身　唔通翻拍《头文字D》？

周杰伦日前开完香港“地表最强2”一连10场演唱会之后，马上又开工！佢昨日现身湾仔，同场仲有余文乐，一行人去咗帮衬华嫂冰室。周董同乐仔13年前合作拍过《头文字D》，而当日门口又泊咗《头D》主角嘅爱驱丰田AE86，一度令人怀疑是开拍续集。

可惜，实情唔系拍续集，而只系拍摄旅游节目姐。二人喺华嫂边食边拍，介绍香港嘅美食同景点。唔知系边间电视台咁劲，可以请到两个巨星同场拍节目呢？出街偶遇巨星已经超兴奋，同场食饭直头要尖叫，听讲最后周董同乐仔仲万岁，请晒全场食客添！

电影《头文字D》改编自经典同名漫画，由周杰伦、黄秋生、余文乐和陈冠希等人主演，当年唔止票房大卖，周董亦凭借该戏拿下香港电影金像奖最佳新演员及金马奖最佳新人奖！多年来不断传出将拍续集，但都只闻楼梯响，今次都系食诈糊，睇嚟Fans又要集气了！