【金盆𠺘口】黄子华宁愿吉位唔益黄牛 4月24公开发售每人限买4张
黄子华栋笃笑骚收山作《金盆𠺘口》今日信用卡优先订飞，全城掀起扑起热潮，有网民话打左几百个电话都打唔通，真正系一票难求，唔通真系焗住要畀贵几倍？
黄子华今日须都未剃就Facebook开Live澄清，事关原来佢嘅团队喊晒口打畀佢，起初黄子华以为系啲飞唔卖得，但原来唔系㖞，子华神语重深长解释：“系因为一朝早电台阿、记者阿，各方面都揾佢哋，网站啲人卖黄牛话有内部既渠道，各位，𠮶啲话有飞既黄牛，我到今日为止都系冇飞”子华神有有考虑报警，但可惜未任何证据去举报，黄子华仲向政府提出：“黄牛最大嘅问题，系根据现有法例唔系exactly系犯法，所以先每一个演唱会都出现咁多问题，我正式向政府有关部门提出系时候要正视呢个问题，可能因为睇演唱会好似奢侈品咁，所以咪唔理你，当你炒卖iPhone咁。”
但最令黄子华嬲嘅，系网民对佢嘅误解，佢仲越说越激动：“我之前都有睇过网上评论，讲到都有啲激动，各位我冇咁嘅本事，我比任何人都觉得嬲！因为每日临训之前谂返𠮶句野点讲呢、有句野点讲仲谂左成个月，大家都好辛苦，但就畀啲唔需要努力嘅人卖贵7倍”
“我一路都系接受世界系唔完美，但系咁系太过不完美，太过离谱！我呼吁政府帮吓手，观众唔买唔紧要嘅，我做骚见到有一大段最前嘅位空晒佢，咁如果我见到好多场都系咁，即系好多人系冇买黄牛，咁我会补返畀佢地啰，不过可能要出年。”
黄子华预告 4月24号将会正式喺城市售票网卖飞，总共场有二十几场，每人限买4张，佢解释：“原本预2场休息，仲有1场预打风赔畀大家，依家推晒出嚟！应该系有唔少嘅飞，我上次做11场红馆，今次系多过double！”黄子华希望尽量满足观众，毕竟总会有有人买唔到飞，希望大家体谅，佢仲搞笑话前2日见到吴君如，吴君如笑佢：“睇你奀挑鬼命边做到2几场！”，为咗满足一众粉丝，子华神决定顶硬上踩足廿几场！