欧阳日华上《劲歌》外貌声线似足张敬轩　唱跳风格有的士陈style

咦！乜张敬轩咁快又上无线音乐节目《劲歌金曲》嘅？上个月农历新年佢先上过去推介新歌《缺》咋㖞。

相信大家都会有同一错觉，斋睇相以为相中人就系张敬轩本人，网上亦有好多人因为呢个似是而非嘅“张敬轩”而引发讨论。其实佢喺嚟自澳门嘅唱跳新人欧阳日华（Kane），近期嚟到香港四出宣传与韩国女Rapper Kisum合唱嘅新歌《Crazy For You》。

欧阳日华不单只外貌酷似张敬轩，就连说话声线都有八、九成相似，单凭呢两点走进香港乐坛都足以成为一时热话。当然，作为歌手，现场表现都好重要！欧阳日华先后到《劲歌金曲》及《乐势力》宣传并现场展现佢嘅唱跳能力，不得不承认佢喺3分钟内边唱边跳，额头出埋汗但气都唔喘，可见底子相当扎实，但就如网民评价一样：“跳舞部分占八成，得两成时间系唱歌，有啲本末倒置㖞。系咪排舞师玩佢呀？”

有啲人更将佢同2003年时参加新秀唱跳《Ra Men Song》嘅陈伟霆作比较，指欧阳日华除咗因为个样同把声似轩仔而红之外，更会因为舞姿而“红”，只不过可能系“红”得比较另类，带有少少耻笑成份𠮶只。