Bob萧正楠张振朗做《美女厨房》新主持　“会继续贱贱格格”

TVB未来除咗有多不胜数嘅新剧等住播，仲有好多精彩嘅综艺节目畀观众边睇边笑。今日TVB就喺香港国际影视展中宣布之后有一系列播出，包括有马国明、黄智雯、胡鸿钧嘅《降魔的 捉妖游戏》、马国明同黄心颖情侣档嘅《深宫计之闯关游戏》同古巨基做返以前各种工作岗位嘅《古巨基初心再体验》。不过，大家最关心嘅应该都系林盛斌（Bob）、萧正楠同张振朗主持嘅《美女厨房》第二辑，会唔会去得返第一辑嘅高度。

今日Bob同萧正楠代表节目接受《香港01》访问时就坦言为此有压力，其中萧正楠就咁讲：“我呢方面零经验，惊拖垮成个节目，同埋呢个节目都系咁多人嘅回忆，但监制畀好大信心我，话个节目形式同上一辑唔同，同埋阿Bob喺度我都好放心，希望可以为观众带来欢乐，好难得有机会可以试下去令全场现场观众捧腹大笑。”

至于Bob就话虽然可以圆喺一厂做大骚呢个心愿，但始终第一辑太经典：“完全明白网友话我阿Bob、萧正楠同张振朗呢个组合有啲‘特别’，同以前郑中基、方力申同梁汉文畀有啲落差咁，但我都好多谢大家关注呢个节目，所有意见都会收到，亦都会借此慢慢改善个节目，都好想咁多位主持人可以建立到个默契。其实我好多谢好多传媒朋友同网友嘅关注，今次对我嚟讲系一个工作上好重要嘅里程，因为可以喺一厂主持一个系列嘅综艺节目系我做主持人嘅梦想，但系另一方面亦系一个好大嘅挑战，因为上一辑嘅主持实在做得太好，亦系好多观众心目中嘅经典同集体回忆，所以我完全明白同尊重消息传出之后大家嘅反应同意见，各位网友们嘅留言，无论正面定负面，对我嚟讲都系好重要嘅推动力，令我明白自己不足嘅地方，好好检视自己点样可以再做好d，进步同改善。”

有唔少人就担心三位新主持，比起曾爆肚讲“啲奶假嘅”嘅方力申、郑中基同梁汉文唔够贱格，Bob笑谓：“其实我哋三个都唔系咩好人！但其实以前个尺度同依家都会唔同，公司依家都未必想太踩界、太暴露，但互吋、碎咀都会继续贱贱格格嘅。”

记者笑指萧正楠已经够哂贱，萧正楠即爆笑：“多谢你㖞！不过我都希望可以将自己生活中嘅顽皮放入节目度，好想同新拍档擦出新火花，等我可以继续分享多啲笑声畀大家。”至于“粥粉面饭”的人选，Bob就指未定，但比起美女如云，他更想节目会有更多煮得之人：“上辑得苏玉华嘅嘢放得落口咋！”至于有网友话说话太大声，Bob就话：“之前有网友话过我做主持讲嘢好大声、好嘈、好浮夸，其实最近我主持《大玩特玩》真系有去好好控制自己声量，亦尝试唔好吓吓都咁夸张、咁癫，我发觉出嚟效果唔错，身边好多朋友都话睇得好开心，所以好多网友们嘅意见都系好有建设性，我真系好希望一步一步去努力改进，令观众同网友们对我改观！”真系好正能量呀！