【美女厨房】吴雨霏邓紫棋曾荣膺地狱厨神　多年过去有无进步？

隔咗9年TVB终于正式宣布重启《美女厨房》，当年呢个节目最高收视达42点，依家睇返转头真系高得好夸张。依家问大家边个女艺人最煮得，一时三刻真系未必讲得出，但问到边个火烧厨房食到主持冲去呕，𠮶几位地狱厨神大家印象应该更深刻。不过呢人系会进步嘅，趁新一辑节目reboot，一齐睇下几位地狱厨神依家又煮成点。

当年获-32分嘅Kary吴雨霏，虽然喺总决赛以些微比数，唔使冠名“地狱厨神”，不过上厨艺节目可以搅到火烧厨房，要工作人员拎住灭火筒冲出嚟救，呢一幕真系永留大家心中，难以磨灭。事隔多年后Kary已经做咗洪师奶，不时下厨喂饱老公个胃，上个月仲大住个肚落田收割大萝卜，亲自下厨炒呀炒，爱心萝卜糕真系唔惹少。

就咁睇Ella其实似系识煮返两味，点知一上节目便知龙与凤，凭住一道“尿味濑尿虾”，加上生油浸熟蔗虾，荣膺首辑《美女厨房》“地狱厨神”封号。阿妈教落做女人要入得厨房出得厅堂先嫁得出，随住年月过去Ella都有用心钻研厨艺。嫁人后诞下一子一女，暂时都仲系全职凑小朋友，大仔开始食嘅固体食物都由Ella亲自下厨，猪肉红萝卜洋葱红腰豆白饭、猪肉白饭香肠仔、蒸南瓜面包，真系又睇得又食得架。

2009年G.E.M.上节目时只得18岁，唔识煮其实情有可原，好地地煮熟啲食材咪算啰，又要加入自己创意，整出一味“屎味鱼蛋”，粉丝试食赞完好味都忍唔住冲去厕所呕，方力申更将“G.E.M.”戏称为“Get Everyone Moving to the trash”（让每个人都走去垃圾桶）。虽然好有阴影〕，但G.E.M.从未放弃过煮嘢食，拍MV又住，见好姐妹又煮，走上谢霆锋节目又一齐煮，睇落的确有板有眼咗好多，不过之前就试过炒炒下蛋搅到火警钟狂响，唔，下次都系安全至上好啲啦。