蔡洁原来系才女　书展准备出原创小说：我钟意文字

关于蔡洁，大家最记得系啲咩？系佢喺《香港仔》同曾志伟嘅肉搏戏，定系佢狠飞“男神”王宗尧？相信之后大家会有更多机会认识佢更多，因为佢今日就正式同邵氏兄弟以及星王朝签约，成为呢两间公司共同管理嘅艺人，其实都几肯定佢日后会有更多电视、电影嘅演出。

蔡洁接受《香港01》访问时就指旧公司太阳娱乐好支持佢呢个决定：“佢哋好为我好，所以我好幸运。喺新公司想多拍好嘅作品，会尝试多啲嘢。（做导演？）我系读幕后出身，其实嚟紧都会出小说，文字一早写好，但又想揾插画师朋友画插画，所以就迟咗少少先出到。”

蔡洁目标系书展时可以出到佢本新书：“虽然一直有Keep住写故事，但做导演其实好庞大嘅工作，要做就要做好准备，负返个责任，暂时做好演员工作先。（原来你都系才女。）唔好咁讲，只系我个人比较静，钟意用文字分享自己。”

记者笑指王晶喜欢旗下女艺人拍戏著得少布，问佢制唔制时，她笑住答：“我边有呢个Quality！每个演员都有自己长处同方向，晶哥、乐小姐（乐易玲）都会帮我揾到个方向，佢哋觉我啱做我就会做。”