【任噏乱评】Facebook同《流行经典》都系老嘢先睇　你同意吗？

今时今日，相信大家都好少会睇电视，大台剧集一套比一套胶，唔少人都转战中、日、韩，唔系讲紧食放题啊，系讲紧改煲韩剧、大陆剧，咩《那年花开》、《三生三世》，相信大家冇睇过套剧，都有听过个名。唯独星期六日有个节目，令到一班平时唔睇大台嘅人，都愿意系电视前面放低一个钟，就系《流行经典50年》，呢个节目真系救咗唔少星期六日嘅收视，所以个节目就翻煲再翻煲，无限loop……

起初个节目本身就叫《流行经典50强》，请一班有翻咁上下经验嘅前辈级歌手上台唱几嘴，好似张帝、潘美辰、叶振棠、李龙基等等，一班唔讲你会以为佢系唱粤曲嘅歌手一齐唱吓K，睇个卡士，观众Target应该系一班老友记。

谁知道个节目越玩越潮，嘉宾一个比一个后生，就连Joey都上去唱Medley卖回忆，侧田、小肥、Shine，陈晓东都上埋去唱《划火柴》，Facebook个个人争住Share话“系回忆啊”，咁你就老喇。老系因为除咗你同班老友记一齐睇电视之外，仲因为依家边有人玩Facebook，冇睇过条短片咩？街访一班中、小学生，佢哋话：“Facebook系老嘢先用！”即系你啊！

新一代系用Instagram唔会上Facebook，相信你连Snapchat都未听过啦；当大家仲笑紧“而我不知道陈伟霆是谁”嘅的士陈嘅时候，00后追星追紧TFBOYS、胡一天、迪丽热巴、赵丽颖；星期六仲追紧《流行经典50年》嘅同时，人哋系上优酷追《热血街舞团》睇陈伟霆同鹿晗Battle跳舞，节目入面仲有个劲红嘅星叫王嘉尔Jackson，系人气韩团GOT7成员之一，咩话GOT7？系咪粗口嚟？帮大家打打底，虽然王嘉尔Jackson系韩星，但其实佢系香港人嚟，依家喺大陆红到核爆，系咪好混乱？仲荒谬嘅都仲有，依家喺大陆16亿人口入面，“陈伟霆”呢个名系仲红过我哋上神台嘅“陈奕迅”，安已不。