【流氓大亨】结局系万梓良亲自写剧本 Do姐：突然好大声so what
最近《流氓大亨》大受欢迎，事关前日播出万梓良真打吴启华的一幕令到劲多人讨论，除了觉得那场戏相当迫真，还有更多人想知道究竟真打完点收科？吴启华嬲到走咗咁之后点算？今日郑裕玲Do姐就在电台上分享当年的往事，原来除了佢吴启华，周海媚、曾江和Do姐都试过做受害者。
Do姐讲起万子这个演员，她说：“呢个演员系非常之认真，佢要一啲反应尤其是打人，佢希望系真啲嘅反应。最近好多人问我一场戏，我呢个记得，喺高等法院门口，𠮶次所有女主角都齐晒，我、嘉玲、周海媚，仲有媚姐南红姐，仲有一个叫吴启华做奸角。万子拎起一个垃圾桶一嘢车落吴启华度，各位如果你系有睇就真系恭喜你，当时我哋系真反应，佢真系拎起𠮶个道具垃圾桶车落吴启华，吓到我哋啲女人呢，尤其是媚姐，我地捉都捉佢唔住，吴启华即刻起咗个瘤。”
“好喇，个场戏完咗，吴启华一声唔出跳上㗎车揸走咗，系嬲咗，我哋成班企喺度o晒咀。我个心紧系自私自利喇，我六点钟起身，入清水湾化妆，去到中环拍得呢两个镜头就俾万子一个垃圾桶就搞到吴启华走咗，佢嬲呀，𠮶时佢好后生。咁我哋咪望住万子啰，佢话得㗎喇，呢啲咁嘅细路真系，你等佢冷静吓，我心谂死喇，咁咪原车返清水湾啰。”
返到厂又揾唔到吴启华，三点钟又要开厂，好在吴启华两点九终于出现，Do姐继续回忆往事：“𠮶阵佢都炆炆地个样，佢平时都黑口黑面，系而家廿几岁人先笑得多啲。万子一见到佢一嘢搭住佢膊头叫佢出去，倾完一大餐就无事开厂。自此之后大家都好惊，即刻睇返啲剧本有无人会俾万子打，周海媚系做万子个妹，但同吴启华拍拖，之后会俾万子知道咗就掴佢，大家就话你死喇救你唔到。拍𠮶场足足俾万子打咗几廿吓，面都红晒。”
“我自己都领过嘢，我唔知系《生命之旅》定《流氓大亨》，佢掴我一巴，我死喇，我拎住个剧本人都震埋。个导演同我讲唔使惊，个镜头系会打爆个画面，你块面会爆晒个画面，咁只手离开四吋打过去咪得。我咪即刻通知万子，佢同我讲唔得㗎Dodo，我只手一定要喺呢度拉弓，如果唔系真，唔会有真实反应，你有乜好讲，佢又为套戏，佢觉得系咁样你点驳返佢呢，结果牙骹都甩埋呀唔系讲笑，红晒块面。”
当然万子受人尊敬并不只他会打人，其实仲有好多劲嘢，《流氓大亨》个ending系佢写！Do姐说：“原来佢真系好多本事，有次系讲佢饮晒酒醉晒撞到曾江，佢呕真系可以即刻真呕，呕到佢成件西装都系。仲有《流氓大亨》个ending真系要俾返个credit万梓良，因为𠮶场戏系佢写，我哋倾过好多ending，因为好多人有反应所以一定要好，咁有次收工已经2am喇，我就紧系返屋企瞓觉，佢就开夜车写剧本写到天光。我都唔系点好过，佢六点几就打俾我，问我可唔可以早啲返，咁我晕鬼咗喺度㗎喇（戏中），无反应，佢话可唔可以听佢做一次，要返去清水湾，就咁电话得唔得呀？唔得，要现场听一次。佢真系一个好好嘅演员，声泪俱下，做得好好，不过好彩佢俾我现场听一次，如果现场第一次听，我真系会喊，但我昏迷㗎嘛唔可以有声。𠮶场一开全场静晒，无人够胆有声，连打灯平时好嘈都无声，佢喺度蕴酿情绪，我就最好喇，喺度瞓渣嘛，真系瞓著咗。突然之间有个人好大声咁so what，我就知拍紧，成场戏顶多take 2就得咗。”