杜汶泽狠批霸位澳大利亚华侨　“从车位反映香港命数！”

杜汶泽一向有碗话碗有碟话碟，仲成日对周遭发生嘅事又或者社会现象畀辛辣评论，引起好多网友都激烈地参与讨论。最近，阿泽就转载澳大利亚邮报（Daily Mail Australia）喺社交平台贴出一段短片，片中有多个华裔女子喺停车场车位栋笃企喺度霸位，唔畀司机停泊该位置，虽然司机多次（爆粗）指出车位系畀车泊而唔系畀人企，所以应该让他用先，但众女都未为所动，其中一位戴红色颈巾嘅女士仲以纯正嘅广东话大闹司机“野蛮”，搞到司机冇瘾另觅位置。

阿泽睇完段片后就指自己听得出该名颈巾女是操港式广东话，因而指她是香港人，之后就顺住落话有时香港人为咗争取一样嘢真系可以好尽，但到了要争取应有权利是却缩沙：“争取车位可以唔要面，唔要命，你车死我吖！争取应有嘅权益，咁就无谓搞咁多嘢啦！或者连其他人争取，冇叫你帮手，你都觉得佢哋讨厌，甚至打死佢哋。肯争取𠮶啲，又高高在上，以为人地支持你系应份，又莫视自己无能！”令好多网友都觉得佢讲得好到位。

明显系讲紧香港政治气氛嘅阿泽更直言：“如果其他人争取嘅方法，只要你觉得太极端，太冇文化，同你争取嘅方法唔同，就唔系同路人，就唔系人，就系鬼。从一个车位，多少反映到一个地方嘅命数！”睇嚟阿泽睇香港前景都睇得几灰下。有网民留言就话遇到类似情况就会自认黑仔走人费事嘈，而阿泽亦回应指自己都懒得纠缠，亦有网友搞笑地话呢班女子可以去做电影场务，但阿泽就神回：“到佢做𠮶阵一定走开。”暗指香港人眼中只著重自己利益。