【港女讲感情】容祖儿刘浩龙5年恋情告急？　男人最忌冇上进心

成日都话要男女平等，真系有可能咩？

容祖儿自从同刘浩龙拍拖之后，大家一直都唔睇好佢哋呢段感情，一个系乐坛天后，英皇一姐，一个就捞极都捞唔起，最红嘅一单新闻就系刘浩龙食饭嫌对面整车工人只手污糟，“污糟手论”被人讲足佢一个星期，应该算系佢嘅事业颠峰。因为佢哋两个人喺事业之间嘅悬殊关系，自不然大家都default刘浩龙系食软饭，虽然就冇证据显示，但只要刘浩龙揸Benz食好西，大家都会觉得系Joey畀钱。

【港女讲感情】阿娇钟欣潼认爱赖弘国　有钱有样边使人“埋单”？

【港女讲感情】姊妹淘易惹猜忌　英皇“龙虎豹”走过16年最难得

一个被人话包养小白脸，一个话食拖鞋饭，面对住舆论压力，Joey同刘浩龙都行到5年，都令唔少人大跌眼镜。但现实中边有咁多童话，女尊男卑注定冇好结果，有传媒爆料“龙儿恋”终于玩完，而经理人Mani就封口唔回应话：“私人事不作回应。”唔覆咪即系默认？听落就真系好似散咗，但咪住先，刘浩龙4月27喺麦花臣开演唱会，上网Check吓，严重滞销，580蚊贵飞轻松禁到40张冇难度，今次话分手会唔会系宣传咋？

不过其实喺娱乐圈女尊男卑呢条路真系好难行，好似之前Do姐同吕方，又或者蔡依琳同锦荣，女人喺一段关系做主导，通常都唔会有好收场，就算系当年世纪双J恋，周董都可以话够晒料同蔡依琳同Level，都唔算话系女尊男卑，但就系因为蔡依琳太霸道钟意话事，双J最终都系唔可以开花结果。

娱乐圈中其实有唔少情侣都系女方比较能干，搞到男方就活喺“软饭”阴影之下，不过都有唔少成功反Cup例子，所以唔好畀大家睇死自己，都系港女最钟意讲𠮶句，睇吓你有冇上进心嘅啫。好似张继聪咁，𠮶阵同谢安琪结婚之后人人都谢继聪谢太咁叫佢，但佢就冇被网民打沉，默默咁苦耕，佢冇拣job二线三线位都照接，仲要比其他人勤力，上位做一线小生拍台庆剧，用自己实力证明自己系唔需要靠老婆，仲够养阿Kay等佢可以唔出嚟做嘢同埋一对囝囡，真系非常励志！唔志佢，仲有蔡少芬老公张晋，杨怡同罗仲谦咁，罗仲谦前排做访问其中一句说话讲做嘢再辛苦，有时候打电话畀老婆佢同我讲佢睇紧电视，顿时觉得辛苦可以换嚟老婆幸福生活系值得。

好简单，其实再叻再能干嘅女人都系想被男人照顾，而张继聪同罗仲谦都仲膊头去揹起头家，再望返刘浩龙，加油啦你真系，天后都系女人，畀啲安全感佢。